هاوینی ئەمساڵ پڕۆژەی فریاگوزاریی خێرای ئاوی هەولێر تەواو دەبێت

ئاڤا نیوز

 

پرۆژەی فریاگوزاریی خێرای ئاوی هەولێر 24 كاتژمێری كاری تێدا دەكرێت كە بڕیارە ئەم هاوینە تەواو بكرێت؛ بەهۆیەوە دوو ملیۆن هاووڵاتیی هەولێر لێی سوودمەند دەبن و هەزار بیری ئاو دادەخرێن.

 

وێنە گەورەكە: پرۆژەکە بە یەكێك لە پڕۆژە گرنگ و ستراتیژییەكانی كابینەی نۆیەمی حكومەتی هەرێمی كوردستان دادەنرێت كە بە گوژمەی 480 ملیۆن دۆلار جێبەجێ دەكرێت و بە تەواوبوونی گرفتی كەمی ئاوی خواردنەوە لە هەولێر بۆ 30 ساڵی ئایندە، چارەسەر دەكات.

 

ڕاگەیێنراوی فەرمی: ماڵپەڕی فەرمی فەرمانگەی میدیا و زانیاریی حكومەتی هەرێمی كوردستان ڕایگەیاندووە، ئێستا 50%ـی پڕۆژەی فریاگوزاریی ئاوی هەولێر تەواوبووە كە لە كاتژمێرێكدا 20 هەزار مەتر سێجا ئاو دابین دەكات واتە 60%ـی پێداویستی ئاوی هەولێر دابین دەكات و نزیكەی دوو ملیۆن هاووڵاتی لە پڕۆژەكە سوودمەند دەبن.

 

 فەرمانگەی میدیا و زانیاری ئاماژەی بەوەشكردووە، نزیكەی پێنج هەزار كارمەند و كرێكار كاری تێدا دەكەن و 20 هەزار كەسیش ناڕاستەوخۆ لەو پڕۆژەیە سوودمەند بوونە.

 

پڕۆژەكە 500 كیلۆمەتر بۆری بە قەبارەی جیاواز لەخۆدەگرێت و لەئێستادا تۆڕی گواستنەوەی ئاو گەیشتووەتە ناو شاری هەولێر و بەر لە تەواوبوونی پڕۆژەكە تۆڕی ئاو بە گەڕەكەكانەوە دەبەسترێتەوە و بە تەواوبوونیشی هەزار بیری ئاو دادەخرێن.