كابینەی داهاتوو لەبەردەم ئاڵنگارییەكاندا

 لێكتێگەیشتن نزیكە بۆ پێكهێنانی كابینەی دەیەمی حكومەتی هەرێمی كوردستان، بە سەرۆكایەتیی مەسرور بارزانی و بەشداریی پارتی و یەكێتی و هەرهێزێكی دیكەش بیەوێت بەشداری حكومەت بێت. 

 

وا دەردەكەوێت ئاڵێنگاری و پێشهات و رووداوە چاوەڕوانكراوەكان لە عێراق و دەوروبەر، ئەوە دەخوازن هێزە سیاسییەكانی هەرێمی کوردستان  بەرەو یەكدەنگی و پێكەوەكاركردنی زیاتر بڕۆن زیاتر لە دابەشبوون و ناكۆكی، ئەمەش ئەگەری پێكهێنانی كابینەیەكی بنكە فراوان بەسیاسەتێكی یەكگرتوو، زیاتر دەكات.

 

بارودۆخی دەوروبەر بەتایبەت رووداوەكانی سووریا و ئەو قۆناغە نوێیەی گەلی كوردی تێكەوتووە لە رۆژئاوای كوردستان، ئەوە دەخوازێت هێزە سیاسییەكانی هەرێمی کوردستانیش بە دیدگایەكی زیاتر یەكگرتوو و بەرپرسیارانە بیر لە قۆناغی نوێ بكەنەوە.

 

 تەنانەت ئەو هێزانەش كە نەیانویستووە بەشداریی حكومەت بن، لەوانەیە جارێكی دیکە بیر لە بەشداری بكەنەوە، چونكە تێدەگەن بەو بەشدارییە دەتوانن رۆڵێكی سیاسی ئەكتیڤتر بگێڕن، چ لە چارەسەری ئاڵێنگاریەكانی بەردەم هەرێمی كوردستان لەگەڵ عێراق و چ لە پێشكەشكردنی دیدگا و راوێژی سیاسی بە هێزە سیاسییەكانی رۆژئاوا، ئەمە جگە لە ناردنی پەیامێک بۆ وڵاتانی ناوچەكە و جیهان، كە كورد یەكدەنگە و لەم قۆناغەدا چاوی لە یەک ئامانجە.

 

بەڵام خۆ ئەگەر هێزە سیاسییەكان بەشداری حكومەتیش نەكەن، دەبێ لە هەستیاری ئەم قۆناغە سیاسییەی ئێستا تێبگەن ، كێشەكانی هەرێمی کوردستان لەگەڵ حكومەتی ناوەندی و بابەتی مووچە و بودجە و ناوچە جێناكۆكەكان و كێشەكانی كەركووك و پرسی هەناردەكردنەوەی نەوت و ئەو مەترسیانەش پێشبینی دەكرێت رووبەرووی عێراق ببنەوە، ئەوە دەخوازێت هێزە سیاسییەكانی هەرێمی کوردستان لێكتێگەیشتن و یەكگوتاریی زیاتر پەیڕەو بكەن.

 

 گرنگە هێزە سیاسییەكان بە كۆ لەخۆیان بپرسن، ئایا لەماوەكانی رابردوودا لە پرسە گشتییەكانی وەك بڕینی بودجە و راگرتنی هەناردەی نەوت و دواكەوتنی مووچە، "چەند گوتاری هێزە سیاسییەكانی كوردستان" لە نێوان هەرێم و بەغدا دا چ  دەستكەوتێكی هەبووە؟

 

ئایا رەخنەگرتنی هەرێمی کوردستان و موجامەلەكردنی لایەنی عێراقیی لەلایەن هەندێک هێز و كەسایەتی لە هەرێمی کوردستان چ سوودێكی بە چارەسەری كێشەی مووچە و بودجە گەیاند؟ بە ئێستاشەوە كە بڕیاری دادگای فیدراڵی هەیە، ئەگەر پێداگری و زیرەكی حكومەتی هەرێمی کوردستان نەبێت یەک دینار لە بەغداوە نایەت.

 

 ئەمە لە كاتێكدا ئەگەر هێزە سیاسییەكان بە یەک دەنگ رەخنەی حكومەتی ناوەندییان بكردایە لەبارەی بڕینی مووچەی خەڵک و بڕینی بودجە، ئەگەری هەبوو حكومەتی عێراقیان زیاتر بخستایەتە ژێر فشار، بەڵام نەک هەر ئەمە نەكرا بەڵكو هەندێک لایەن و كەسایەتی بەتایبەت پارلەمانتارانی پێشوو ئەوەندەی دیکە حكومەتی عێراقیان هاندەدا بۆ بەردەوامبوون لەسەر سیاسەتی بڕینی بودجە و دواخستنی مووچە، تەنانەت سكاڵای دادگای فیدراڵیش نەک هەر كێشەكەی چارەسەر نەكرد، بەڵكو ئەوەندەی تر باری سەرشانی هەرێمی کوردستان و فەرمانبەرانی قورستر كرد.

 

 خۆ ئەگەر پێداگری كابینەی نۆ و سیاسەتی توند و زیرەكانەی سەرۆکوەزیران مەسرور بارزانی و كابینەكەی نەبووایە ئەو بڕە مووچەیەش بە بیانوی جیاجیا نەدەهات و ئەمانیش جگە لە پاساو هێنانەوە چیتریان دەتوانی بكەن؟

 

 كەواتە دەبێ ئەو هێزانە لە خۆیان بپرسن، ئایا گەڕانەوەی ئێمە بۆ بەغدا و دژایەتیمان بۆ هەرێمی کوردستان چ دەستكەوتێكی بۆ خەڵكی كوردستان تیادابوو، جگە لەوەی حكومەتی هەرێمی کوردستانمان خستە ژێر فشاری زیاتر؟

 

ئەزموونی  پێشووی "چەند گوتاری"، لەگەڵ پێشهاتە نوێیەكان و قۆناغی نوێی ناوچەكە، ئەوە دەخوازن هێزە سیاسیەكانی هەرێمی کوردستان پێداچوونەوەیەکی جددی بە سیاسەتە پۆپۆلیستەكانیاندا بكەنەوە و دووبارە بە حساباتی خۆیاندا بچنەوە.

 

باوەڕمان وایە هەرێمی كوردستان قەڵای پارێزەری هەمووانە، هەر بەهێزبوونێكی ئەم قەڵایە لەسوود و قازانجی هەموو كوردە، ئەم دەستكەوتە كە بێگومان بێ كەموكورتیش نییە، دەبێت بە هەموو لایەک پارێزگاری لێبكرێت و بەهێز بكرێت و دەسەڵاتەكانی فراوانتر بكرێت، ئەمەش لە رێگەی حكومەتێكی بنكە فراوانی یەكگرتووی بەرپرسیار بەسەرۆكایەتی مەسرور بارزانی، ئەنجام دەدرێت.