شاندێکی ئەمریکا بۆ ئەنەکەسە: دەبێت بەزووترین کات کورد یەک بگرێت

ئاڤا نیوز

 

شاندێکی ئەمریکا و ئەنەکەسە لە قامشلۆی ڕۆژئاوای کوردستان کۆبوونەوە و بەشداریی کوردییان لە دانووستانەکانی دیمەشق و حکومەتی نوێی سووریا تاوتوێ کرد. 

وێنە گەورەکە: دوای ڕووخانی حکومەتی بەشار ئەسەد، پرسی ئایندەی کورد و قەوارەی ڕۆژئاوای کوردستان لەبەردەم چارەنووسێکی مێژووییدایە لە سووریای نوێ، هەوڵەکانیش بەو ئاراستەیەن کورد یەک دەنگ و یەکگرتوو بێت و بە یەک شاند بچێتە دیمەشق بۆ گفتوگۆکردن، مەزڵوم عەبدیش داوای هاوکاری لە بەرپرسانی باڵای هەرێمی کوردستان کردووە.


چیرۆکی سەرەکی: ئەمڕۆ یەکشەممە، 05-01-2025، شاندێکی باڵای ئەمریکا سەردانی سەرۆکایەتیی ئەنەکەسەی لە قامیشلۆ کرد و باسیان لە دۆخی ئێستای سووریا و گرنگیی یەکڕیزیی کورد لە دانوستانەکانی دیمەشق کرد.

 

لێدوانی فەرمیی: فەیسەڵ یوسف، وتەبێژی ئەنجوومەنی نیشتمانیی کورد لە سووریا (ئەنەکەسە) بە ئاڤا نیوزی ڕاگەیاند:

 

- لە کۆبوونەوەکەدا دۆخی ئێستای سووریا بە گشتی و  گرنگیی یەکڕیزی کورد لە قۆناغی ئێستا و بەشداریی کورد بە یەک شاند، لە دانووستانەکانی دیمەشق بە تایبەت تاوتوێ کرا.

 

- شاندی ئەمریکا بە ئێمەیان گوت: دەبێت بەزووترین کات کورد لە سووریا یەکبگرێت و نابێت هەڵەکانی پێشوو لە بەرامبەر یەکتری دووبارە بکەنەوە، کۆبوونەوەی تریش دەکرێت. 

 

باگگراوند: لە 31-12- 2024 لە قامشلۆ، لەژێر سەرپەرشتیی ئەمەریکا، کۆبوونەوەیەک لە نێوان ئەنەکەسە و مەزڵوم عەبدی، فەرماندەی گشتیی هێزەکانی هەسەدە کرا،  هەردوولا دووپاتیان لە یەک گوتاری و یەک هەڵوێستی کورد لە ڕۆژئاوای کوردستان کردەوە.