مەزڵووم عەبدی داوای هاوکاری لە بەرپرسانی هەرێمی کوردستان دەکات

ئاڤا نیوز

 

مەزڵووم عەبدی داوا لە بەرپرسانی باڵای هەرێمی کوردستان دەکات هاوکاریان بن لە چارەسەرکردنی کێشەی کورد لە سووریای نوێ و پاراستنی ڕۆژئاوای کوردستان، بەرپرسانی کوردیش لەگەڵ ئەنقەرە و واشنتن و دیمەشق بەردەوام لەسەر هێڵن. 

وێنە گەورەکە: دوای ڕووخانی حکومەتی بەشار ئەسەد، پرسی ئایندەی کورد و قەوارەی ڕۆژئاوای کوردستان لەبەردەم چارەنووسێکی مێژووییدایە لە سووریای نوێ، هەوڵەکانیش بەو ئاراستەیەن کورد یەک دەنگ و یەکگرتوو بێت و بە یەک شاند بچێتە دیمەشق بۆ گفتوگۆکردن.

زانیاریی تایبەت: ئاڤا میدیا زانیویەتی چەندین پەیوەندی تەلەفۆنی لە نێوان مەزڵووم عەبدی، فەرماندەی گشتیی هەسەدە و بەرپرسانی باڵای هەرێمی کوردستان کراون.

لەسەر داوای مەزڵوم عەبدی بەرپرسانی هەرێمی کوردستان لەگەڵ ئەنقەرە و واشنتن و دیمەشق بەردەوام لەسەر هێڵن، بۆ ئەوەی مافی کورد لە پرۆسەی سیاسی سووریا بپارێزن.

یەکگرتوویی کورد بە خاڵی بەهێزی دابینکردنی زۆرترین ماف بۆ کورد دادەنرێت، سەرەتای هەوڵەکانیش بە یەکخستنی ئەنجوومەنی نیشتمانیی کورد (ئەنەکەسە) و هێزەکانی سووریای دیموکرات (هەسەدە) دەستیپێکردووە، چاوەڕوان دەکرێت لە چەند ڕۆژی داهاتوودا هەماهەنگییەکان چڕتر ببنەوە.

باکگراوند: لەسەر داوای سەرۆک بازرانی بۆ یەکخستنەوەی داواکارییەکان و چوونی کورد بە یەک شاند بۆ دیمەشق، مانگی ڕابردوو شاندی ئەنەکەسە لەگەڵ هەسەدە کۆبووەوە.