مووچەی 25 هەزار خانەنشینی دیکە لەگەڵ عێراق هاوتا دەکرێت

ئاڤا نیوز

 

بەشێک لەو خانەنشینانەی کە مووچەکانیان هاوتا نەکراوە، ناڕازین و لە ڕێی ئاڤاوە داوا دەکەن دەنگیان بەلایەنی پەیوەندیدار بگەیێنرێت، بەرپرسێکی باڵای خانەنشینیش لەوبارەیەوە دەڵێت "با خەمیان نەبێت مووچەی هەموو خانەنشینێک هاوتا دەکرێت".

 

وێنە گەورەکە: خانەنشینان دوو کۆمەڵەن، ئەوانەی دوای 1-1-2014 خانەنشین کراون، مووچەکانیان لە 1-7-2024 هاوتا کراوە، بەڵام ئەوانەی پێش ئەو بەروارە خانەنشین کراون 30 هەزار کەسن، تاوەکو ئێستا پێنج بۆ شەش هەزاریان مووچەکانیان هاوتا کراوە، ئەوانی تر ماون.

 

لێدوانی فەرمی: ئەحمەد عەلی، ئەندامی دەستەی باڵای یەکێتیی خانەنشینانی کوردستان، بە ئاڤا میدیای ڕاگەیاند:

 

- ئێمە لەو کۆمەڵە خانەنشینەین کە پێش 1-1-2014 خانەنشین کراوین، بڕیارەکەی دادگای فیدراڵی و ئەنجوومەنی وەزیرانی هەرێمی کوردستان بۆ هاوتاکردنی مووچە دەمانگرێتەوە، بەڵام تاوەکو ئێستا مووچەکانمان هاوتا نەکراوە، داوا دەکەین مووچەی ئێمەش هاوشێوەی خانەنشینەکانی دیکە هاوتا بکرێت.

- خانەنشینانی کۆیە و ڕانیە و هەڵەبجە کە لەگەڵ ئێمە خانەنشین کراون، مووچەی مانگی 11ی 2024یان بە هاوتاکراوی وەرگرت، ئێمە پەیوەندیمان بە بەڕێوەبەری خانەنشینی سلێمانییەوە کرد، بەڵام وەڵامی نەداینەوە.

لەلایەکی دیکەوە: سەرچاوەیەکی باڵا لە بەڕێوەبەرایەتیی گشتیی خانەنشینی هەرێمی کوردستان، بە ئاڤا میدیای ڕاگەیاند:

 

- دڵنیایی بە خانەنشینان دەدەین کە مووچەی هەموویان هاوتا دەکرێت، هۆکاری دواکەوتنی هاوتاکردنەکەش ئەوەیە کە پێڕاناگەین، هەندێک فەرمانگە سیستمەکەی خاوە و هەندێکیان خێرایە.

- کارەکان هەمووی بە قۆناغ دەکرێن، بۆ مووچەی مانگی یەک زۆرینەی خانەنشینان مووچەیان بە هاوتاکراوی وەردەگرن.

ئەوەی پێویستە بیزانیت: لە هەرێمی کوردستان 270 هەزار خانەنشین هەیە، تاوەکو ئێستا نزیکەی 150 هەزار خانەنشین مووچەکانیان هاوتا کراوە.