عێراق پێش هەڵبژاردن مووچەی مانگی نۆی نەنارد

ئاڤا نیوز

هەرچەندە حکومەتی هەرێمی کوردستان سەرجەم ڕێککارەکانی تایبەت بە مەرجەکانی ناردنی مووچەی ئەنجامداوە، بەڵام حکومەتی عێراق تاوەکوو ئێستا مووچەی مانگی نۆی فەرمانبەرانی هەرێمی کوردستان نەناردووە.


چیرۆکی سەرەکی: بەهۆی ئەوەی سبەی پرۆسەی دەنگدانی تایبەت و ڕۆژی سێشەممەش دەنگدانی گشتی لە عێراق و هەرێمی کوردستان بەڕێوەدەچێت، لە دامودەزگاکانی حکومەت پشووە بەمەش کۆبوونەوەی ڕۆژی سێشەممەی ئەنجوومەنی وەزیرانی عێراق بەڕێوەناچێت، ناردنی پارەی مووچەش چاوەڕوان دەکرێت بکەوێتە دوای هەڵبژاردن.


ئەوەی پێویستە بیزانیت: دواخستنی ناردنی مووچەی لەلایەن بەغداوە لەکاتێدایە کە لە ڕۆژی 27ی ئەیلوولەوە هەناردەکردنەوەی نەوت دەستی پێکردووەتەوە کە یەکێک بوو لە مەرجە سەرەکییەکانی ناردنی مووچە، هاوکات مەرج و ڕێککارەکانی دیکەش بریتین لە ناردنی لیستی مووچە و میزان مراجەعە و 120 ملیار دیناری ناوخۆ لەلایەن حکومەتی هەرێمی کوردستانەوە.

بڵاوکراوەی فەرمی: زیاتر لە 10 ڕۆژە حکومەتی هەرێمی کوردستان ڕایگەیاندووە، کە ئەو ڕێککارانە ئەنجام دراون و عێراق بڕیاری ناردنی مووچە بدات ڕاستەوخۆ 120 ملیارەکە دەنێردرێت بەڵام لە دوو کۆبوونەوەی ڕابردووی ئەنجوومەنی وەزیرانی عێراق هیچ بڕیارێک لەمبارەیەوە نەدرا.

لەلایەکی دیکەوە: سەرکردایەتیی کورد و بەرپرسانی باڵای هەرێمی کوردستان، لە ڕۆژانی ڕابردوودا چەند جارێک پەیام و لێدوانیان سەبارەت بە دواخستنی ناردنی پارەی مووچە لەلایەن بەغداوە، لە نوێترینیاندا لە دوو ڕۆژی ڕابردوو سەرۆکوەزیران مەسرور بارزانی، بۆ میدیاکان گوتی: بەداخەوە کە پرسی مووچە بە سیاسی کراوە، هەمیشەیش گوتوومانە کە حکوومەتی هەرێمی کوردستان هەموو پابەندییەکانی خۆی جێبەجێ کردووە؛ هەرچی پێویست بوو بێت بە زیادەوە کردوومانە.

 
- سەرۆکوەزیرانی کوردستان لە بەشێکی دیکەی قسەکانیدا گوتی، "چاوەڕێ بووین حکوومەتی فیدراڵ بەرپرسیارانە ڕەفتار بکات، هاوکات دڵنیایی دا لەوەی لەگەڵ بەغدا لەسەر هێڵن بۆ بە زووترین کات ئەوەی مووچە دابین بکرێت.