دەنگدانی تایبەت کۆتایی هات و ئاڤا ئەنجامە بەراییەکان بڵاو دەکاتەوە

ئاڤا نیوز

 

کاتژمێر 6:00ـی ئێوارە، پرۆسەی دەنگدانی تایبەت لەسەرجەم پارێزگاکانی عێراق و هەرێمی کوردستان کۆتایی پێهات و ئامێرەکانی دەنگدان لە کارکردن وەستان، ئاڤا زانیاریی ورد لەبارەی ئەنجامی دەنگدانی تایبەت بڵاودەکاتەوە.

چیرۆکی سەرەکی: ئەمڕۆ لە پرۆسەی دەنگدانی تایبەت یەک ملیۆن و 313 هەزار و 980 کەس مافی دەنگدانیان هەبوو. لەگەڵ ئەوەشدا 26 هەزار و 538 ئاوارە لە کەمپەکان دەیانتوانی دەنگبدەن.

 

لێدوانی فەرمی: جومانە غەلای، وتەبێژی کۆمسیۆنی باڵای سەربەخۆی هەڵبژاردنەکان لە عێراق ئاشکرایکرد، پرۆسەی دەنگدان لە کاتژمێر 7ـی بەیانی دەستیپێکردووە و بەبێ ئەوەی ماوەی دەنگدان درێژبکرێتەوە لە کاتژمێر 6ـی ئێوارە سەرجەم ئامێرەکانی دەنگدان لەناو بنکەکاندا دەوەستن و ناتوانرێت هیچ دەنگێکی دیکە بدرێت.

 

غەلای ئاماژەی بەوەکرد کە پاش کۆتاییهاتنی پرۆسەی دەنگدانی تایبەت، ئەنجامەکان بڵاوناکرێنەوە بۆئەوەی کاریگەریی لەسەر پرۆسەی دەنگدانیی گشتیی درووست نەکات لە رۆژی 11ی 11ی 2025، بەڵام زانیارییەکانی دیکەی پەیوەندیدار بە چۆنێتی بەڕێوەچوونی پرۆسەی دەنگدانەکە دەخرێنەڕوو.

 

ئاڤا  یەکەمە: لەم هەڵبژاردنەدا دیسکی هەڵبژاردنی ئاڤا بە پشتبەستن بە داتا و زانیارییە وردەکان و تۆڕی پەیامنێران لە شار و ناوچە جیاجیاکانی کوردستان و عێراق، ئەنجامە بەراییەکان بڵاودەکاتەوە.

زانیاریی زیاتر: پەیوەست بە دەنگدانی هێزە ئەمنییەكانیش؛ ڕێژەی بەشداریكردن لە پارێزگاكانی هەرێمی كوردستان بەراورد بە پارێزگاكانی عێراق، بەرزترە، بەپێی ئاماری فەرمیی كۆمیسیۆن، تاوەكو كاتژمێر 1:00ـی دوای نیوەڕۆ؛ ڕێژەی بەشداریكردن لە پارێزگاكانی هەرێمی كوردستان سەرووی 77% بووە، لە پارێزگاكانی عێراقیش 60% بووە. بەڵام بەپێی زانیارییەكانی ئاڤا لە بنكەكانی دەنگدان؛ تاوەكو كاتژمێر 4:00ـی ئێوارە ڕێژەی بەشداریكردن لە هەرێمی كوردستان گەیشتووەتە سەرووی 92%، بەجۆرێك لە هەولێر؛ ڕێژەی بەشداریكردن 96%ـە و لە سلێمانی 94%ـە و لە دهۆك 87%ـە.