دووەم دیداری زانستی و عیرفانی شێخ عەبدولقادری گەیلانی بەڕێوەچوو

ئاڤا نیوز

بەمەبەستی ڕووبەڕووبوونەوەی لادانە فیكرییەكان، لە هەولێر دووەم دیداری زانستی و عیرفانیی شێخ عەبدولقادری گەیلانی بۆ گەنگەشەكردنی هزری سۆفیگەری لە سایەی میانڕۆیی ئایینی بەڕێوەچوو.

چیرۆكی سەرەكی: لە هەولێر، دووەم دیداری زانستی و عیرفانی شێخ عەبدولقادری گەیلانی بە بەشداریی پارێزگاری هەولێر، سەرۆكی یەكێتیی زانایانی ئایینی كوردستان و ژمارەیەكی بەرچاو لە شێخانی تەریقەت، زانا و مامۆستایانی ئایینی و مامۆستایانی زانكۆ و ئەكادیمیستان بەڕێوەچوو.

بابەتە ستراتیژییەكە: لە دیدارەكەدا گەنگەشە لەبارەی فیکری سۆفیگەری لە سایەی میانڕەویدا كرا، لەپێناو ڕووبەڕووبوونەوەی لادانە فیكرییەكان.

لێدوانی فەرمی: ئومێد خۆشناو، پارێزگاری هەولێر لەڕێگەی ئاڤاوە وێڕای ستایشكردن و بەرزنرخاندنی ڕێكخستنی ئەو دیدارە، ئاماژەی بەوەكرد، ڕەوتی سۆفیگەری هەر لە سەرەتاوە بە پاشخانێكی جوان و مەعریفییەوە گەشەی سەندووە و دواتر بەدامەزراوەیی بووە.

باکگراوند: تەریقەتە سۆفیگەرییەکان، لەسەردەستی شێخ عەبدولقادر گەیلانی بناغەی داکووتاوە، شوێنکەوتووانی لەسەر ڕێباز و  بیروباوەڕ و ڕەفتارەکانی بەردەوام بوون، بۆیە شێخی گەیلانی وەک کاریگەرترین کەسایەتیی دونیای تەسەوف مایەوە، بەجۆرێك لەكاتی كۆچی دوایی، ماتەمی گشتی شاری بەغدای داگرت و زۆرینەی دانیشتووانی ئەو شارە بەشداری مەراسیمی ناشتنەكەیان كرد.