سەرۆکی بەتەمەنی پەرلەمانی عێراق بۆ ئاڤا: هیچ کەسێک ئێستا بە نزیکترین کاندید دانانرێت

ئاڤا نیوز

سەرۆکی فراکسیۆنی تەسمیم و سەرۆکی بەتەمەنی پەرلەمان بە تووندی دەنگۆکانی بوونی کاندیدی دیاریکراو بۆ سەرۆکوەزیران ڕەتکردەوە و ڕایگەیاند، قسەکان لەسەر حەیدەر عەبادی و نووری مالیکی "ڕاست نین" و هیچ کەسێک ئێستا بە نزیکترین کاندید دانانرێت.

وێنە گەورەکە: دوو ڕۆژ لە بەردەم لایەنە سیاسیەکانی عێراق ماوە بۆ یەکەم دانیشتنی پەرلەمان کە بڕیارە لە 29ـی ئەم مانگە بەڕێوەبچێت و عامر فایز، بەتەمەنترین پەرلەمانتار سەرۆکایەتیی دانیشتنەکە بکات.

لێدوانی فەرمی: عامر فایز لە بە ئاڤای ڕاگەیاند: هێشتا ئەگەرەكان بۆ دیمەنە سیاسییەكە كراوەن." گوتیشی ئەو ناوانەی لە میدیا بڵاودەکرێنەوە "ڕاست نین." سبەی کۆبوونەوەی چوارچێوەی هەماهەنگی لە ماڵی مالیکی بۆ گفتوگۆکردن لەسەر دۆسییە هەڵپەسێردراوەکان بەڕێوەدەچێت.

ئەوەی ئێستا ڕوودەدات: سەبارەت بە کارەکانی پەرلەمان، فایز دووپاتی کردەوە "یەکەمین کۆبوونەوەی خولی شەشەمی پەرلەمان نزیکە" و خۆی سەرۆکایەتی دانیشتنەکە دەکات بۆ هەڵبژاردنی سەرۆکی پەرلەمان. ئاماژەی بەوەشدا هیچ لایەنێک پێشنیازەکەی سوودانی ڕەتنەکردووەتەوە.

ئەوەی پێویستە بیزانیت: فایز ڕوونی کردەوە، "تێگەیشتنەکانی ئێستا ئامانجیان دڵنیابوونە لە بەڕێوەچوونی پرۆسەی یاسادانان بە شێوەیەکی ڕێکوپێک، بەبێ ئەوەی لایەنێک لەسەر حیسابی لایەنێکی دیکە سوودمەند بێت." وتی قسەکانی دابەشکردنی وەزارەتەکان بەپێی تائیفی یان حیزبی "بە هیچ شێوەیەک ڕاست نین".