بەرگریی شارستانی هۆشداری بە هاونیشتمانیان و گەشتیاران دەدات

ئاڤا نیوز

تیمەکانی بەرگریی شارستانی لەسەرجەم پارێزگا و ئیدارە سەربەخۆکان خراونەتە حاڵەتی ئامادەباشی، داواش لە هاونیشتمانیان و گەشتیاران دەکرێت، سەرکێشی نەکەن و زۆر لە ڕێگاکان دوور نەکەونەوە.

وێنە گەورەکە: هاوکات لەگەڵ پشووەکانی سەری ساڵ، شەپۆلێكی بەفر و باران هەرێمی کوردستانی گرتووەتەوە، خەڵکێکی زۆر لە گەشتیاران و هاونیشتمانیان بۆ بەسەر بردنی کاتێکی خۆش، ڕوو لە ناوچە شاخاوییەکان دەکەن، بەتایبەت ئەو شوێنانەی بەفری زۆری لێدەبارێت.

لێدوانی فەرمی: سەرکەوت کاڕەش، گوتەبێژی بەرگریی شارستانیی هەرێمی کوردستان، بە ئاڤای گوت: لە ڕۆژی چوارشەممەوە 24-12-2025، تیمەکانمان لە سەرجەم پارێزگا و ئیدارە سەربەخۆکان خراونەتە حاڵەتی ئامادەباشی، ئەرک و ئامادەباشی تیمەکانمان بەمجۆرە دابەش بوونە:

یەکەم؛ لە سەنتەری شارەکان و ئەو شوێنانەی ئاهەنگ و فێستیڤاڵ و چالاکی سەری ساڵی  لێ ئەنجام دەدرێت.

دووەم؛ ئەو شوێنانەی بەفری زۆری لێ دەبارێت و خەڵکێکی زۆر ڕوویان تێدەکات.

سەرکەوت کاڕەش ئەمانەشی گوت:

٠ داوا لە هاونیشتمانیان، گەشتیاران و شاخەوانان دەکەین، بەهیچ جۆرێک لە ڕێگاکان دوورنەکەونەوە، بۆ ئەوەی تووشی گیرخواردن نەبنەوە، چونکە سەرکێشی کردن و دوورکەوتنەوە لە ڕێگاکان مەترسیدارە و ڕزگارکردنیشیان لەم جۆرە کەشەوهەوایە قورسە.

٠ بۆ هەر بارودۆخێک و هەر حاڵەتێکی پێویست هێڵی گەرمی 115 کراوەیە و تیمەکانمان بەپێی بارودۆخەکە، ڕێکاری پێویست دەگرنەبەر.

٠ پێویستە هاونیشتمانیان بە وریاییەوە گەرمکەرەوەکان (سۆپای غاز، سۆپای نەوت، هیتەری کارەبایی) بەکاربهێنن، پابەندی ڕێنماییەکانی بەرگریی شارستانی بن بۆ ئەوەی دوور بن لە ڕووداوی نەخوازراوە.

زانیاریی زیاتر: لەبارەی ڕووداوەکانی ئەمساڵ، سەرکەوت کاڕەش گوتی: ئەمساڵ 64 حاڵەتی خنکان لەناو ئاودا هەبووە و زۆرترینی لە پارێزگای هەولێر بووە. هاوکات نزیکەی 14 هەزار ڕووداوی ئاگرکەوتنەوە هەبووە، بەراورد بە ساڵی ڕابردوو بە ڕێژەی 20% کەمیکردووە.