لە سنووری باڵەكایەتی بەفر ئاستەنگیی هاتووچۆی دروست كردووە

ئاڤا نیوز

 

بەهۆی زۆری ڕێژەی بەفربارین، ئاستەنگیی هاتووچۆ لە ناوچە شاخاوییەكانی سنووری باڵەكایەتی دروست بووە، تیمەكانی شارەوانی و بەرگریی شارستانیی چۆمان، سەرقاڵی ڕاماڵینی بەفر و پاككردنەوەی ڕێگاوبانەكانن.

 

وێنە گەورەكە: شەپۆڵێكی چڕ بەفر و بارانبارین هەرێمی كوردستانی گرتووەتەوە و پلەكانی گەرما بەڕێژەیەكی بەرچاو دابەزیون، شەپۆڵەكە تاوەكوو ڕۆژی سێشەممەی داهاتوو بەردەوام دەبێت.

 

زانیاریی پەیامنێر: هاوار عەباس، پەیامنێری ئاڤا میدیا لە ئیدارەی سەربەخۆی سۆران ڕایگەیاند، تیمەكانی ڕاماڵینی بەفر سەر بە شارەوانیی چۆمان، بەهەماهەنگیی لەگەڵ بەرگریی شارستانی سەرقاڵی ڕاماڵینی بەفر و ڕشاندنی خوێ ـن لەسەر ڕێگەی سەرەكیی چۆمان - حاجی ئۆمەران بۆ تواندنەوەی بەستەڵەك و شەختەی ڕێگاكە.

 

بە تەنیشت ئەم بابەتەوە؛ ژمارەیەكی زۆری گەشتیاران بۆ بەسەربردنی پشووەكانی سەری ساڵ لە كەشی بەفر و دیمەنی سەرنجڕاكێشی سپیپۆشی ناوچە شاخاوییەكان، سەردانی دەڤەری باڵەكایەتییان كردووە، سەرجەم كوخ و شوێنە گەشتیارییەكانی ئەو دەڤەرە لەلایەن گەشتیارانەوە حیجز كراون.