بەفر ڕێگای سەرەکیی نێوان دوو ئیدارەی سەربەخۆ دادەخات

ئاڤا نیوز

بەهۆی بارینی بەفرێكی زۆر لە ناوچە شاخاوییەكانی سنووری ناحیەی وەرتێ، ڕێگەی سەرەكیی زینی وەرتێ داخراوە، کە هەردوو ئیدارەی سەربەخۆی ڕاپەڕین و سۆران بەیەكەوە دەبەستێتەوە.

چیرۆكی سەرەكی: ئەمڕۆ شەپۆڵێكی چڕی بەفر و بارانبارین زۆربەی ناوچەكانی هەرێمی كوردستانی گرتووەتەوە، لە سنووری ناحیەی وەرتێ سەر بە ئیدارەی سەربەخۆی سۆران، نزیكەی 20 سانتیمەتر بەفر باریوە، بەهۆیەوە ڕێگای هاتووچۆی ئەو ناوچەیە داخراوە و تا ئێستاش ڕێگاكە لەلایەن تیمەكانی چاككردنەوەی ڕێگاوبانی ئیدارەی سۆران، پاک نەكراوەتەوە.

لێدوانی فەرمی: شۆڕش حەسەن، بەڕێوەبەری ناحیەی وەرتێ بە ئاڤای وت، لە ناحیەكەیان ئامێری تایبەت بە پاككردنەوە و ڕاماڵینی بەفر نییە بۆیە نەیانتوانیوە ڕێگاكە پاكبكەنەوە، بۆیە داوایان لە بەڕێوەبەرایەتیی چاككردنەوە و پاراستنی ڕێگاوبانی ئیدارەی سۆران كردووە بۆ ڕاماڵینی بەفری ڕێگاكە و كردنەوەی بەڕووی هاتووچۆی شۆفێراندا.

زانیاریی پەیامنێر: هەنگاو محەممەد، پەیامنێری ئاڤا لە ئیدارەی سۆران قسەی لەگەڵ شۆڕش حەسەن، بەڕێوەبەری ناحیەی وەرتێ كردووە و دەڵێت، تا ئێستاش بەفرێكی چڕ لە ناوچەكە دەبارێت، ئەمەش ئاستەنگی هاتووچۆی لە ڕێگای زینی وەرتێ دروستكردووە. لەمەرزی کێلێش بەهۆی زۆری چڕی بەفر بارینەوە، چەند ئۆتۆمبیلێک خۆیان بەیەکدا کێشاوە و گیریان خواردووە و داوای بەهاناوە چوون دەکەن.

پەیوەست بەم بابەتە: فەرمانگە خزمەتگوزارییەکانی سنووری ناحیەی وەرتێ، داوا لە شۆفێران و هاونیشتمانیان دەکەن، ڕێگەی زینی وەرتێ بۆ هاتووچۆ بەكارنەهێنن، بەو پێیەی ڕێگاكە سەلامەت نییە و مەترسی لەسەر ژیانیان دروست دەكات، تەنانەت ئۆتۆمبێلی دەبڵ ئەكسڵ و بڵندیش دەربازبوونی ئەستەمە.