ژمارەی ئامێرەكانی ڕاكێشانی پارە زیاد دەكرێن

ئاڤا نیوز 

 

وەزارەتی دارایی و ئابووریی حكومەتی هەرێمی كوردستان ئاشكرای دەكات، لەگەڵ زیادبوونی سوودمەندانی پڕۆژەی هەژماری من، ئامێرەكانی ڕاكێشانی پارەش زیاتر دەكرێن.

 

وێنە گەورەکە: بە ئامانجی هێنانەکایەی ئاسانکاریی زیاتر بۆ هاووڵاتییانی هەرێمی کوردستان، حکومەت بەردەوامە لە پتەوکردنی ژێرخانی بە دیجیتاڵیکردن و لەو چوارچێوەیەشدا دەیەوێت سەرجەم مووچەخۆران لە ڕێگەی هەژماری منەوە مووچەکانیان وەربگرن و تا ئێستا پڕۆسەکە بە سەرکەوتووانە بەردەوامە.

 

ڕاگەیێنراوی فەرمی: وەزارەتی دارایی ڕایگەیاند: مانگ بە مانگ سوودمەندانی هەژماری من زیاتر دەبن، ناوچە و پارێزگای دیکە بە تەواوەتی بە دیجیتاڵی مووچە وەردەگرن، هەروەها ئامێرەکانی ڕاکێشانی پارەش هاوتەریب زیاد دەکرێن لەگەڵ ژمارەی سوودمەندان.

 

زانیاریی زیاتر: بۆ مووچەی ئەم مانگە لە ماوەی چوار ڕۆژدا زیاتر لە 250 هەزار مووچەخۆر بە دیجیتاڵی مووچەیان وەرگرت.

 

ئەوەی پێویستە بیزانیت: ئێستا سەرجەم فەرمانبەرانی شارستانی لە سنووری پارێزگای هەولێر لە هەژماری من تۆمار كراون و ئەم مانگە سەرجەمیان بە دیجیتاڵی مووچەیان وەرگرت.

 

ئەمەش بزانە: ئێستا زیاتر لە 500 ئامێری ڕاکێشانی پارە لە شار و شارۆچكەكانی هەرێمی كوردستان بەردەستخراون و تیمەكانی هەژماری من سەرقاڵی زیاتركردنی ژمارەكەن.