پێشنیازكراوە لیستی نوێی خاوەن پێداویستە تایبەتەكان بۆ دابینكردنی مووچە ڕەوانەی بەغدا بكرێت

ئاڤا نیوز

بەڕێوەبەری گشتیی چاودێری و گەشەپێدانی كۆمەڵایەتیی هەولێر، دەڵێت، پێشنیازمان بۆ وەزارەتی دارایی و ئابووری كردووە؛ سەرلەنوێ لیستی نوێی ناوی كەمئەندامانی هەرێمی كوردستان، ئەوانەی ئەمساڵ لەلایەن لیژنە پزیشكییەكانەوە بە كەمئەندام تۆماركراون بۆ وەزارەتی دارایی عێراق بنێرێت، بەمەبەستی تۆماركردنی ناویان لە وەرگرتنی مووچەی تۆڕی كۆمەڵایەتی.

وێنە گەورەکە: زیاتر لە ساڵێكە لیستی نوێی سەرجەم كەمئەندامانی هەرێمی كوردستان ڕەوانەی وەزارەتی دارایی عێراق كراوە، بەڵام تاكو ئێستا كاری پێویستی لەسەر نەكراوە، وەزارەتی كار و كاروباری كۆمەڵایەتیش پێشنیاز بۆ وەزارەتی دارایی و ئابووریی هەرێمی كوردستان دەكات، سەرلەنوێ لیستێكی ناوی خاوەن پێداویستە تایبەتەكان بە زیادكردنی ناوی ئەوانەشەوە كە ئەمساڵ پلەی كەمئەندامیان لەلایەن لیژنە پزیشكییەكانەوە دیاریكراوە، دووبارە بۆ بەغدا بنێرێتەوە.

لێدوانی فەرمی: یوسف چاوشین، بەڕێوەبەری گشتیی چاودێری و گەشەپێدانی كۆمەڵایەتیی هەولێر بە ئاڤای ڕاگەیاند، بە یاوەری وەزیری كار و كاروباری كۆمەڵایەتی، سەردانی وەزیری دارایی و ئابووریی هەرێمی كوردستانمان كرد و لە دیدارێكدا باسمان لە مووچەی خاوەن پێداویستە تایبەتەكان كرد كە زیاتر لە ساڵێكە لیستی ناوەكان دەرچووە و لە وەزارەتی دارایی عێراقە، بەڵام كاری پێویستی لەسەر نەكراوە.

زانیاریی زیاتر: هاوكات بژاردەیەكی دیكە خرایە بەردەم وەزیری دارایی و ئابووری، ئەویش ئامادەكردنی لیستی نوێی خاوەن پێداویستە تایبەتەكانی هەرێمی كوردستانە، بە ئەوانەشەوە كە ئەمساڵ لەلایەن لیژنە پزیشكییەكان وەك كەمئەندام دیاریكراون، بەمەبەستی ناردنی بۆ بەغدا و تۆماركردنی ناوەكانیان لە تۆڕی كۆمەڵایەتی لەپێناو دابینكردنی مووچە بۆیان.