نیکۆلاس مادۆرۆ جارێکی دیکە بووە سەرۆکی ڤەنزوێلا

ئاڤا نیوز

 

نیکۆلاس مادۆرۆ، بۆ جاری سێیەم بە سەرۆکی ڤەنزوێلا هەڵبژێردرا و وڵاتانی خۆرئاواش دەڵێن، مادۆرۆ هیچ شەرعیەتێکی دیموکراسی نییە.

 

وێنە گەورەکە: نیکۆلاس مادۆرۆ، سەرۆکی ڤەنزوێلا جارێکی دیکە وەک سەرۆکی ئەو وڵاتە سوێندی یاسایی خوارد، ئەمەش دوای بەڕێوەچوونی پرۆسەی هەڵبژاردنەکان کە بە شێوەیەکی بەرفراوان تۆمەتبار دەکرێت بە یاریکردن بە ئەنجامەکان.

 

لێدوانی فەرمی: مادۆرۆ لە یەکەم لێدوانیدا وەک سەرۆکی هەڵبژاردراوی ڤەنزوێلا ڕایگەیاند: ئەوەی دەتەوێت بیڵێ، ئەوەی پێویستە بیکە، بەڵام ئەم بەرەوپێشچوونە دەستورییە نەتوانرا بووەستێنرێت و سەرکەوتنێکی گەورەی دیموکراسییە لە ڤەنزوێلا.

 
بۆچوونی لایەنی بەرامبەر: ئەمریکا ڕایگەیاند، ئیدانەی دووبارە هەڵبژاردنەوەی نیکۆلاس مادۆرۆ دەکات و سزای نوێشی بەسەر ڤەنزوێلادا سەپاند و بڕی 25 ملیۆن دۆلاری دیاریکردووە بۆ هەر کەسێک بتوانێت زانیاری لەسەر ئەو تاوانەی سەرۆکی ڤەنزوێلا بدات و پێی دادگایی بکرێت.

 

هاوکات، کایا کاڵاس، بەرپرسی سیاسەتی دەرەوەی یەکێتیی ئەوروپا ڕایگەیاند، نیکۆلاس مادۆرۆ، بەهیچ شێوەیەک شەرعیەتی دیموکراسی نییە و یەکێتیی ئەوروپا پشتگیری ئەو کەسانە دەکات کە بەرگری لە بەها دیموکراسیەکان دەکەن لە ڤەنزوێلا.

 

باکگراوند: وڵاتان و پارتەکانی ئۆپۆزیسیۆن نیکۆلاس مادۆرۆ بە ساختەکاریکردن لە هەڵبژاردنەکانی 28ی تەممووزی ساڵی ڕابردوو تۆمەتبار دەکەن، ئەمریکا و یەکێتیی ئەوروپا و چەند وڵاتێکی ئەمریکای لاتین، ئێدمۆندۆ گۆنزالێز کاندیدی ئۆپۆزسیۆنیان وەک سەرۆکی شەرعی هەڵبژێردراوی ڤەنزوێلا ناساندووە.