لە بەغدا لیژنەیەک بۆ کێشەی مووچەی فەرمانبەرانی کوردستان پێکدەهێنرێت

ئاڤا نیوز


لیژنەی دارایی ئەنجوومەنی نوێنەران بڕیاریدا بە پێکهێنانی لیژنەیەک بۆ بەدواداچوون بۆ کێشەی مووچەی مانگی 12ی مووچەخۆران و کێشە داراییەکانی نێوان هەرێمی کوردستان و بەغدا.

 

وێنە گەورەکە: حکومەتی هەرێمی کوردستان بەرامبەر بە پێشێلکردنی مافە دەستوورییەکان لەلایەن بەغەداوە نیگەرانە، سەرۆکوەزیرانی مەسرور بارزانی پێیوایە ئەو ڕەفتارەی ئێستای بەغدا بەرامبەر هەرێمی كوردستان دەیكات، قبووڵكراو نییە.

 

چیرۆکی سەرەکی: یەکشەممە 11-1-2025، لیژنەی دارایی لە ئەنجوومەنی نوێنەرانی عێراق بە ئامادەبوونی تەیف سامی، وەزیری دارایی عێراق لەبارەی چەند پرسێکەوە کۆبووەوە.

 

لێدوانی فەرمی: نەرمین مەعرووف، ئەندامى لیژنەى دارایى لە ئەنجوومەنى نوێنەرانى عێراق بە ئاڤا میدیای ڕاگەیاند: بۆ بەدواداچوونی چارەنووسی مووچەی مانگی 12 مووچەخۆرانی هەرێمی کوردستان و کێشە داراییەکانی نێوان هەرێمى کوردستان و بەغداد لیژنەیەک لە پەرلەمان پێکدەهێنرێت.

 

لەلایەکی دیکەوە: سەبارەت بە خشتەی بودجەی 2025، د. نەرمین مەعرووف بە پێویستی زانی پێش ئەوەی خشتەی بودجەی 2025 بێتە پەرلەمان و دەنگی لەسەر بدرێت، هەرێمی کوردستان لەگەڵ بەغدا گفتوگۆ بکات و هەمواری ماددەی 11ی یاسای بودجە بکەن و دەستەواژەی ئینفاقی فیعلی لەناو ئەو یاسایە لاببرێت.

 

بە تەنیشت ئەو بابەتەوە: بە گوتەی د. نەرمین مەعرووف، وێڕای بڕیاری دادگای فیدراڵی، هێشتا وەزارەتی دارایی مووچە و هەموو شایستەکانی هەرێمی کوردستان دەخاتە چوارچێوەی ئینفاقی فیعلی خۆی کە لە کۆی 211 ترلیۆن دینار تەنیا توانیویەتی  156 ترلیۆن خەرج بکات، ئەمەش وایکردووە پشکی هەرێمی کوردستان بە مووچەشەوە کەمتر بێت لەوەی لەناو خشتەکاندا پەسند کراوە.