بە بەشداری عێراق؛ سعودیە میوانداریی کۆبوونەوەیەکی نێودەوڵەتی لەبارەی سووریا دەکات

ئاڤا نیوز

 

سبەی یەکشەممە ڕیازی پایتەختی سعودیە میوانداریی کۆبوونەوەیەکی نێودەوڵەتی لەبارەی گۆڕانکارییە سیاسییەکانی سووریا دەکات و عێراقیش بەشداریی تێدا دەکات.

 

ئەوەی پێویستە بیزانیت: کۆبوونەوەکەی بەیانی بە درێژکراوەی کۆبوونەوەی 14ی مانگی ڕابردووی وڵاتانی عەرەبی و ڕۆژئاوا دادەنرێت کە لە عەقەبەی ئوردن بەڕێوەچوو و تیایدا  نەخشەڕێگای داهاتووی سووریا تاوتوێکرا، لە کۆبوونەوەکەی بەیانیشدا سەرنج خستنەسەر هاوکارییە مرۆییەکان و هەڵگرتنی سزا نێودەوڵەتییەکانی سەر دیمەشق تاوتوێ دەکرێن.

 

ڕاگەیێنراوی فەرمی: ئاژانسی ئانادۆڵ بڵاویکردەوە، سبەی هاکان فیدان وەزیری دەرەوەی تورکیا بەشداری لەو کۆبوونەوە نێودەوڵەتییەدا دەکات کە لەسەر ئاستی وەزیرانی دەرەوە لەبارەی سووریا لە ریازی پایتەختی سعودییە سازدەکرێت، هاوکات فوئاد حوسێن، جێگری سەرۆکوەزیران و وەزیری دەرەوە بە نوێنەرایەتی عێراق بەشداری کۆبوونەوەکە دەکات.

 

لەلایەکی دیکەوە: بڕیارە لە کۆبوونەوەکەدا وڵاتانی کەنداو، عێراق، ئوردن، میسر، تورکیا، لوبنان، ئیدارەی نوێی سووریا، فەرەنسا، ئیسپانیا، ئیتاڵیا، ئەمریکا، بەریتانیا، نوێنەری باڵای یەکێتیی ئەوروپا، ئەمینداری گشتیی وڵاتانی کەنداو، ئەمینداری گشتی کۆمکاری وڵاتانی عەرەبی و نوێنەری نەتەوە یەکگرتووەکان بۆ سووریا بەشداری بکەن.