ئایدن مەعرووف: حکومەتی عێراق نەفەسێکی دوژمنکارانەی بەرامبەر هەرێمی کوردستان هەیە

ئاڤا نیوز 

 

وەزیری هەرێم بۆ کاروباری پێکهاتەکانی حکومەتی هەرێمی کوردستان، کۆبوونەوەی دوێنێی ئەنجوومەنی وەزیران، بە کۆبوونەوەیەکی مێژووی ناو دەبات و دەڵێت: سەرۆکوەزیران مەسرور بارزانی، ڕۆڵێکی گەورەی هەیە لە یەکخستنی کورد تاوەکو ببنە یەک تیمی بەهێزی یەکگرتوو لە بەغدا.

 

وێنە گەورەکە: ڕۆژی شەممە ئەنجوومەنی وەزیرانی هەرێمی کوردستان، کۆبوونەوەیەکی نائاسایی بە سەرپەرشتیی سەرۆکوەزیران مەسرور بارزانی و ئامادەبوونی جێگری سەرۆکوەزیران و نوێنەرانی هەرێمی کوردستان لە بەغدا لەبارەی مووچە و بودجە و مافە دەستووری و یاساییەکانی هەرێمی کوردستان کۆبوونەوەیەکی نائاسایی کرد.

 

لێدوانی فەرمی: ئایدن مەعرووف، وەزیری هەرێم بۆ کاروباری پێکهاتەکان لە کاتی بەشداریکردنی پڕۆگرامی نان و چای ئەمرۆی ئاڤا دا گوتی: لە ڕابردوودا حکومەتی عێراق بابەتی مووچەی تێکەڵاوی بابەتە سیاسییەکان کردبوو، ئەمەش کارێکی هەڵە و نادەستوورییە.

 

ئایدن مەعرووف دەشلێت: لە کۆبوونەوەی دوێنێ شەممەدا، کۆمەڵێک خاڵ و داواکاریی گرنگ گەڵاڵە کراوە و ئاڕاستەی بەغدا دەکرێن بۆ ئەوەی جێبەجێیان بکات، بەڵام ئەگەر جێبەجێ نەکران، دەبێت حکومەتی هەرێمی کوردستان هەنگاوی دیکە بگرێتەبەر.

 

هاوکات وەزیری کاروباری پێکهاتەکان باسی لەوەشکرد، بەغدا نەفەسێکی دوژمنکارانەی بەرامبەر هەرێمی كوردستان و مووچەخۆرانی هەیە، کە ئەمە جێگای قبوڵکردن نییە.