عێراق چاودێری گرتووخانەکانی داعش لە سووریا دەکات

ئاڤا نیوز

 

دەزگای هەواڵگریی عێراق هۆشداریی دەدات لە پلانێکی داعش بۆ هێرشکردنەسەر زیندانەکانی ژێردەسەڵاتی هەسەدە لە سووریا، جەختیش دەکاتەوە کە ئێستا بەغدا چاودێریی گرتووخانەکانی داعش لەو وڵاتە دەکات و داواش لە وڵاتان دەکات ئەندامە دەستگیرکراوەکانی ڕێکخراوەکە وەربگرنەوە.

 

ئەوەی پێویستە بیزانیت: لەگەڵ ڕووخانی دەسەڵات لە سووریا، عێراق و بەشێک لە وڵاتانی دیکە ناوچەکە مەترسی خۆیان لە چالاکبوونەوەی ڕێكخراوی داعش و گرووپە توندڕەوەکان ڕاگەیاند، بەوهۆیەشەوە ئاسایشی سنوورەکانیان زیاتر توندکردووە و لەگەڵ دەسەڵاتی نوێی دیمەشقیش بۆ ڕەواندنەوەی مەترسییەکان هاتوونەتەسەر خەت.

 

لێدوانی فەرمی: عەبدولکەریم عەبدفازڵ، سەرۆکی دەزگای هەواڵگریی عێراق بە ڕۆژنامەی سەباحی نیمچە فەرمی ڕاگەیاندووە، هیچ پاساوێک نەماوە بۆ هێشتنەوەی هەزاران چەکداری داعش بۆ ماوەی 10 ساڵ لە گرتووخانەکانی سووریا، کە ئەوانیش بریتین لە مەترسیدارترین "تیرۆریستەکانی جیهان" و داوا دەکەن حکومەتی وڵاتەکانیان وەریانبگرنەوە.

 

سەرۆکی دەزگای هەواڵگری هۆشداریش دەدات کە داعش دەیەوێت هێرشبکاتەسەر زیندانەکانی ژێر دەسەڵاتی هێزەکانی سووریای دیموکرات تا هەزاران ئەندامی لە گرتووخانەکان دەربهێنێت، جەختیش دەکاتەوە کە دەزگاکەیان ئامادەیی هەیە و لەکاتی هەڵاتنی ئەو چەکدارانەدا توانا و ڕێکاری چارەسەری هەواڵگریانەی خۆی بۆ مامەڵە لەگەڵ دۆخەکەدا هەیە، ئێستاش بە هاوکاری هەواڵگریی وڵاتانی هاوپەیمان کار بۆ لەناوبردنی ئامانجەکانیان دەکەن.