وەزارەتی پەروەردە خزمەتگوزارییەكی نوێی دیجیتاڵی ڕادەگەیێنێت

ئاڤا نیوز

 

وەزارەتی پەروەردەی حكومەتی هەرێمی كوردستان بۆ پتەوتركردنی پەیوەندیی نێوان قوتابخانە و بەخێوكاری قوتابیان، خزمەتگوزارییەكی نوێی دیجیتاڵی ڕاگەیاند.

وێنە گەورەکە: وەزارەتی پەروەردەی هەرێمی کوردستان خزمەتگوزاری دیجیتاڵی "ئی-هەڵسەنگاندن"ی ڕاگەیاند، خزمەتگوزارییەکە بۆ یەکەمجارە لە کەرتی گشتیی لەبواری پەروەردەدا دەخرێتە کار و دەبێتە پردێکی پەیوەندیی نێوان کەسوکاری قوتابیان و ناوەندەکانی خوێندن لە هەرێمی کوردستان.

ئەوەی پێویستە بیزانیت: خزمەتگوزاری دیجیتاڵی "ئی-هەڵسەنگاندن" ئەپڵیکەیشنێکە، کە لەڕێگەیەوە دایک و باوک و کەسوکاری قوتابییان دەتوانن ئاگاداری هەموو چالاکییەکانی قوتابییەکانیان بن لە قوتابخانەکان، نمرە و تاقیکردنەوەکانیان، چالاکی رۆژانە و هەر بابەتێکی دیکەی پەیوەندیدار بە قوتابیان لە قوتابخانەدا، ئەپڵیکەیشنەکە دەبێتە پردی پەیوەندی نێوان بەخێوکارانی قوتابی وئیدارەی مەکتەبەکان.

لێدوانی فەرمی: ئالان حەمە سەعید، وەزیری پەروەردەی حکومەتی هەرێمی کوردستان، ڕایگەیاند: ڕاگەیاندنی ئەو خزمەتگوزارییە لەلایەن کەرتی حکومییەوە گرنگە، خزمەتگوزارییەکە بۆ هەمووانە و هەموو ناوەندەکانی خوێندنی حکومی و ناحکومی دەتوانن سوود لە ئەپلیکەیشنەکە وەربگرن.

ئەمەش بزانە: خزمەتگوزاری دیجیتاڵی "ئی-هەڵسەنگاندن" بە زمانی کوردی شێوەزاری سۆرانی و بادینی، زمانی عەرەبی، زمانەکانی تورکمانی و سریانی بەردەستە.