كاروانی دووەمی هاوكارییەكانی پرۆگرامی خۆراكی جیهانی دەگاتە حەسەكە

ئاڤا نیوز

 

كاروانی دووەمی هاوكارییەكانی پرۆگرامی خۆراكی جیهانی لەڕێگەی 10 بارهەڵگرەوە گەیشتە پارێزگای حەسەكە لە ڕۆژئاوای كوردستان، بڕیارە بەسەر پەنابەران و لێقەوماوانی ئەو ناوچەیە دابەش بكرێت.

بۆچی گرنگە: لەگەڵ دەستپێكی هێرش و پەلامارەكانی هێزەكانی سەر بە حكومەتی دیمەشق بۆ سەر هەرێمە كوردنشینەكانی ڕۆژئاوای كوردستان، ئەو ناوچانە كەوتبوونە ژێر گەمارۆیەكی سەختی ئابووری، خەڵكەكەی لە زۆربەی خزمەتگوزاریی و پێداویستیە سەرەكییەكان بێبەش بوون.

- لە ناوەڕاستی ئەم هەفتەیە، ڕێڕەوی مرۆیی بۆ گەیاندنی كۆمەک و هاوكارییەكان بەڕووی دانیشتووان و ئەو ئاوارانەشی ڕوویان لەو ناوچانە كردووە، كرایەوە. ئێستا ڕێكخراوە ناوخۆیی و نێودەوڵەتییەكان لەسەرووی هەمووشیانەوە ڕێكخراوی نەتەوەیەكگرتووەكان بۆ هاوكاریی مرۆیی دەستیكردووە بە گەیاندنی هاوكارییەكان بە ڕۆژئاوای كوردستان.

ئەوەی لەبارەیەوە دەگوترێت: بەپێی میدیاكانی ڕۆژئاوای كوردستان، كەمێک پێش ئێستا دووەم كاروانی هاوكارییە مرۆییەكان كە لەلایەن پرۆگرامی خۆراكی جیهانییەوە دابین كراوە، لەڕێگەی 10 بارهەڵگرەوە گەیێندرایە شاری حەسەكە، لەوێشەوە بەسەر ناوچەكانی دیكە دابەش دەكرێت.

- بارهەڵگرەكان؛ پێداویستی سەرەكیی خواردنی لەخۆگرتووە بۆ ئەو خانەوادانەی كە بەهۆی هێرشی گرووپە چەكدارەكانی سەر بە دیمەشق، ئاوارەبوونە و ڕوویان لە پارێزگای حەسەكە كردووە.

زانیاریی زیارتر: كەرەستەكان بەرەو كۆگاكانی هەڵگرتنی خۆراک دەگوازرێنەوە بەمەبەستی دابەشكردنی بەسەر ئاوارەكان كە زێدی خۆیان لە ناوچەكانی ڕەققە، تەبقە، عەفرین و شەهبا جێهێشتووە.