وەزیری ئاوەدانکردنەوە: قۆناغی دووەمی ڕێگای دووکان - چوارقوڕنە ساڵی 2025 تەواو دەکرێت

ئاڤا نیوز

 

دانا عەبدولکەریم، وەزیری ئاوەدانکردنەوەی هەرێمی کوردستان لەبارەی پرۆژەی دووسایدی ڕێگەی دووکان - چوارقوڕنە دەڵێت، دەبوو  پێش ساڵی 2014 تەواو بکرێت، بەڵام بەهۆی قەیرانی داراییەوە نەتوانرا تەواو بکرێت، دەشڵێت، "قۆناغی دووەمی پڕۆژەکە ساڵی 2025 تەواو دەکرێت".

 

وێنە گەورەکە: خەڵکی گوندەکانی سنووری ناحیەی خەلەکان بەهۆی خراپی ڕێگەی هاتووچۆ و تەواونەکردنی پرۆژەی دووسایدی ڕێگەی دووکان - چوارقوڕنە بۆ ماوەی چەند ڕۆژێک ڕێگەیان بەڕووی ئۆتۆمبێل داخست،  دواتر و دوای وەرگرتنی بەڵێن لە لایەنی پەیوەندیدارەوە ڕێگەکەیان کردەوە.

 

لێدوای فەرمی: لەدوای کۆبوونەوەی لەگەڵ خۆپێشاندەرانی ناحیەی خەلەکان، دانا عەبدولکەریم، وەزیری ئاوەدانکردنەوەی هەرێمی کوردستان ڕایگەیاند، دەبوو پرۆژەی دووسایدی دووکان - چوارقوڕنە پێش ساڵی 2014 تەواوکرابایە کە ئەوکات هیچ گرفتێکی دارایی نەبوس، بەڵام تەواو نەکراوە. وەزیری ئاوەدانکرنەوەی گوتیشی، ساڵی پرۆژەکە 2019 دەستی پێکردۆتەوە بەڵام قەیرانی دارایی ڕێگربوە لەتەواوکردنی.

 

ئەوەی پێویستە بیزانیت: لەبارەی وادەی تەواوکردنی پرۆژەکە، وەزیری ئاوەدانکردنەوە ئاماژەی بۆ ئەوەکرد، بەپێی ئەو ڕێکەوتنەی کراوە دەبێت پرۆژەکە قۆناغی دووەمی تەواو بکرێت و بۆ قۆناغی سێیەمیش چاوەڕوانی بانکی نێودەوڵەتی دەکەن قەرزبدات بە عێراق لە بەشی هەرێمی کوردستان بەو قەرزە تەواوی بکەن، بەڵام ئەگەر ئەو ڕێگایەش نەبوو، هەوڵ دەدەن لەرێگەی حکومەتی هەرێمی کوردستانەوە تەواوی بکەن. 

 

زانیاریی زیاتر: درێژی ڕێگای نێوان دووکان - چوارقورنە 55 کلیۆمەترە و تێچووی هەرسێ قۆناغەکە 150 ملیار دینارە و قۆناغی یەکەم تەواو بووە، قۆناغی دووم سەدا 45 تەواوکراوە و پێویستی بە  زیاتر لە 30 ملیار دینارە بۆ تەواوکردنی.