17مین پێشانگای نێودەوڵەتیی هەولێر بۆ كتێب دەكرێتەوە

ئاڤا نیوز

 

بە چاودێری ڕاستەوخۆی سەرۆک بارزانی، ئامادەكارییەكان بۆ کردنەوەی 17مین پێشانگای نێودەوڵەتیی هەولێر بۆ كتێب دەستیپێكردووە، دەزگاكانی چاپ و بڵاوكردنەوە خۆیان تۆمار دەکەن بۆ بەشداربوون.

 

وێنە گەورەکە: ساڵانە لە پارێزگای هەولێر پێشانگای نێودەوڵەتیی بۆ کتێب دەکرێتەوە، ژمارەیەکی بەرچاو لە دەزگاکانی چاپ و بڵاوکردنەوە لە زۆربەی وڵاتان بەشدار دەبن و کتێبەکانی خۆیان لە پێشانگاکە نمایش دەکەن، خوێنەران و کڕیارانی کتێب لەسەرجەم شارەکانی کوردستان و عێراق بەشدار دەبن.

لێدوانی فەرمی: ئەیهاب قەیسی، بەڕێوەبەری پێشانگای نێودەوڵەتیی هەولێر بۆ كتێب، بە ئاڤا میدیای ڕاگەیاند: بڕیارە لە 9- 4- 2025  پێشانگای نێودەوڵەتیی كتێب بەچاودێریی و سەرپەرشتی ڕاستەوخۆی سەرۆك بارزانی بكرێتەوە کە بۆ ماوەی 10 رۆژ بەردەوام دەبێت، ئەمساڵ پێشانگەیەكی باشتر لە ساڵانی پێشوو بەڕێوە دەبەین.

 

ئەیهاب قەیسی باسی لەوەش کرد، ئاگاداری سەرجەم دەزگا ناوخۆیی و دەرەكییەكان دەكەینەوە كە لە ئێستاوە خۆیان تۆمار بكەن.

ئەوەی پێویستە بیزانیت: پێشانگاکە ماوەی 16 ساڵە بەردەوامە و ئەمساڵ پێ دەنێتە 17 ساڵی تەمەنی، لەماوەی ئەو چەند ساڵەدا هەزاران کتێبی پێشکەش بە کتێبخانەی هاونیشتمانیان کرد و بە كەرنەڤاڵی كتێب ناوبانگی دەركردووە.