نەتانیاهۆ: ئاگربەستی غەززە جێبەجێ ناکەین

ئاڤا نیوز

سەرۆکوەزیرانی ئیسرائیل ڕایدەگەیێنێ، ئاگربەستی غەززە جێبەجێ ناکرێت، ئەگەر حەماس لیستی ناوی بارمتەکان ڕادەست نەکات، حەماسیش دەڵێت، هۆکاری درەنگ ڕادەستکردنی لیستەکە "کێشەیەکی تەکنیکییە".

 

وێنە گەورەکە: ڕۆژی چوارشەممە 15ـی 1ـی 2025، دوای 15 مانگ لە شەڕ و کوژرانی زیاتر لە 46 هەزار کەس، ڕێککەوتنی ئاگربەست و ئازادکردنی دیلەکان بە نێوەندگیریی ئەمریکا و میسر و قەتەر لەنێوان حەماس و ئیسرائیل ڕاگەیێنرا. بڕیار بوو ئەمڕۆ یەکشەممە کاتژمێر 8:30  بە کاتی ناوخۆیی غەززە ڕێککەوتنەکە بچێتە جێبەجێکردنەوە.

 

لێدوانی فەرمی: بنیامین نەتەنیاهۆ، سەرۆکوەزیرانی ئیسرائیل ڕایگەیاند، "ئاگربەستی غەززە لە وادەی دیاریکراوی خۆی ناچێتە بواری جێبەجێکردنەوە، ئەگەر حەماس لیستی ناوی ئەو دیلە ئیسرائیلییانە ڕادەست نەکات کە بڕیارە ئازاد بکرێن.

 

بۆچوونی لایەنی بەرامبەر: لە بەرامبەردا بزووتنەوەی حەماس ڕاگەیێنراوێکی لەبارەی هۆکاری ڕادەست نەکردنی لیستی ناوی دیلە ئیسرائیلییەکان بڵاوکردەوە و ڕایگەیاند، "بەهۆی کێشەیەکی تەکنیکییەوە لیستەکە ڕادەست نەکراوە".

 

لەلایەکی دیکە: ئەمڕۆ یەکشەممە سوپای ئیسرائیل سەرەڕای ڕاگەیاندنی ئاگربەست، ڕەفەحی لە باشووری کەرتی غەززە بۆردوومان کرد.