ترەمپ نهێنییەکانی کوژرانی سەرۆکێکی پێشووی ئەمریکا ئاشکرا دەکات

ئاڤا نیوز

دۆناڵد ترەمپ، سەرۆکی ئەمریکا، بەڵێنێکی دیکەی کاتی بانگەشەی هەڵبژاردنەکانی بەجێگەیاند و بڕیاری ئاشکراکردنی دۆسیەکانی کوژرانی جۆن ئێف کەنەدی، ڕۆبێرت ئێف کەنەدی و مارتین لۆسەر کینگی دەرکرد.

وێنەگەورەکە: تیرۆرکردنی ئەم سێ کەسایەتییە شۆکهێنەرترین کردەی تیرۆری ناو مێژووی ئەمریکان و بە بڕیاری ترەمپ دۆسیەکانیان لە ئاستی نهێنی بۆ ئاستی گشتی دەگوازرێنەوە و نهێنییەکانی ناو دۆسییەکان ئاشکرا دەکرین.

لێدوانی فەرمی: ترەمپ ڕایگەیاند: زۆر کەس ماوەیەکی زۆرە، چەندین ساڵە، چەند دەیەیە کە چاوەڕوانی ئەم ڕۆژەن. هەموو شت ئاشکرا دەبێت.

ئەوەی پێویستە بیزانیت: بە گوێرەی بڕیارەکەی ترەمپ، بەرپرسانی حکومەتی ئەمریکا دەبێت لە ماوەی 15 ڕۆژدا پلانێک بۆ جێبەجێکردنی بڕیارەکە و لابردنی دۆسیەکان لە ناو بەشی دۆسییە نهێنییەکان دابنێن.

ئەمەش بزانە: ترەمپ ئەو پێنووسەی کە فەرمانەکەی پێ واژۆ کردووە، داویەتی بە ڕۆبێرت ئێف کەنەدی جۆنیۆر، کوڕی ڕۆبێرت ئێف کەندی و برازای جۆن ئێف کەنەدی.

باکگراند: جۆن ئێف کەنەدی، سەرۆکی پێشووی ئەمریکا، ساڵی 1963 لە شاری داڵاس لە ئەمریکا تیرۆر کرا. 
ڕۆبێرت ئێف کەنەدی، برای جۆن ئێف کەنەدی، ساڵی 1968، لە کالیفۆرنیا، لە کاتی بانگەشەی هەڵبژاردنەکاندا تیرۆر کرا. دوو مانگ دوای تیرۆری ڕۆبێرت ئێف کەنەدی و هەر لە ساڵی 1968ـدا، مارتین لۆسەر کینگ، ناسراوترین ڕێبەری بزووتنەوەی مافی مەدەنیی ڕەشپێستەکانی ئەمریکا، لە مێمفیس تیرۆر کرا.