خواستی هاتنی کۆمپانیا ئەمریکییەکان بۆ نێو بازاڕی عێراق پیشان دەدرێت

 

ئاڤا نیوز

ژووری بازرگانی ئەمریکی خواستی زۆرێک لە کۆمپانیا ئەمریکییەکان بۆ چوونە ناو بازاڕی عێراق پشتڕاست دەکاتەوە و عێراقیش داوا لە کۆمپانیا ئەمریکییەکان دەکات بەشداربن لەو "گەشەسەندنەی" کە عێراق بەخۆیەوە دەیبینێت.

وێنە گەورەکە: لە میانی سەردانی سەرۆکوەزیرانی عێراق بۆ ئەمریکا لە ساڵی ڕابردوو، 18 ڕێککەوتن و یاداشتنامەی لێکتێگەیشتن لە چەندین بواری بازرگانی لەنێوان عێراق و ئەمریکا واژۆکران.

چیرۆکی سەرەکی: ڕۆژی یەکشەممە لە بەغدا محەممەد شیاع سوودانی، سەرۆکوەزیرانی عێراق پێشوازی لە ستیڤ لۆتس، سەرۆکی ئەنجوومەنی بازرگانی ئەمریکی عێراقی و جێگری سەرۆکی ژووری بازرگانی ئەمریکا کرد.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق له میانی دیدارەکەدا پەیوەندییە بازرگانییەکان و هاوکارییەکانی نێوان عێراق و ئەمریکا خرانەڕوو، هەوڵدان بۆ ئامادەکاری بۆ کۆڕبەندی نوێنەرانی کۆمپانیا ئەمریکییەکان کە لە ئەمساڵدا لە عێراق دەکرێت، هاوکات بەدواداچوون بۆ جێبەجێکردنی ڕێککەوتنەکانی نێوانیان.

 

ئاماژەی بەوەشکرد کە چاکسازی ئابووری توانیویەتی ئاستی وەبەرهێنانی بیانی لەعێراقدا بەرزبکاتەوە و کۆمپانیا ئەمریکییەکان بانگهێشت کراون بۆ بەشداریکردن لەو گەشەسەندنەی کە عێراق بەخۆیەوە دەیبینێت.

بۆچوونی لایەنی بەرامبەر: ستیڤ لۆتس ستایشی هەوڵەکانی حکومەتی عێراقی کرد لەبواری چاکسازیدا و جەختی لەخواستی زۆرێک لەکۆمپانیا ئەمریکییەکان کردەوە بۆ هاتنە ناوەوەی بازاڕی عێراق و دامەزراندنی هاوبەشی بەڵێندەر لەگەڵ کەرتی تایبەتی عێراق و بەشداریکردن لەگەشەپێدان و فراوانکردنی چالاکییەکانی بازرگانی و وەبەرهێنان.