نەتەوە یەکگرتووەکان ئاماری گەڕانەوەی هاووڵاتیانی غەززە ئاشكرا دەکات

 

ئاڤا نیوز

دوای ئەوەی ئیسرائیل ڕێڕەوەکانی بەڕووی فەلەستینییەکان کردەوە، نووسینگەی هەماهەنگی کاروباری مرۆیی نەتەوە یەکگرتووەکان ژمارەی ئەو هاووڵاتییە فەلەستینییانەی کە گەڕاونەتەوە باکووری غەززە ئاشکرا دەکات.

چیڕۆکی سەرەکی: دوای ساڵێک و سێ مانگ شەڕی کەرتی غەززە، هەزاران فەلەستینی ناچاربوون ماڵەکانیان بەجێبهێڵین و ئاوارەبوون و هەزاران کەسیش بەهۆی هێرشەکانی ئیسرائیلەوە کوژران، دواجار بە ڕەزامەندی هەر یەکە لە ئیسرائیل و حەماس ئاگربەست ڕاگەیێنراو ئێستا کاری پێدەکرێت، یەکێک لە بنەماکانی قۆناغی یەکەمی ئاگربەستەکەش ڕێگەدانە بە گەڕانەوەی هاووڵاتیان بۆ باکووری غەززە.

ڕاگەیێنراوی فەرمی: نووسینگەی هەماهەنگی کاروباری مرۆیی نەتەوە یەکگرتووەکان ڕایگەیاند، زیاتر لە 376 هەزار فەلەستینی گەڕاونەتەوە باکووری غەززە.

زانیاریی بەدەستهاتوو: هەندێک لەو ئاوارە گەڕاوەکان ئافرەتانی دووگیان، بەساڵاچوو، کەمئەندام و ئەوانەن کە بەدەست نەخۆشییە درێژخایەنەکانەوە دەناڵێنن، نەتەوە یەکگرتووەکانیش داوای یارمەتی پزیشكیی بەپەلە دەکات.