وۆڵ ستریت جۆرناڵ: قۆناغی دووەمی دانوستانەکانی نێوان حەماس و ئیسرائیل دەستپێدەکات

ئاڤا نیوز

دوای ئەوەی هەریەکە لە سەرۆکی ئەمریکا و سەرۆکوەزیرانی ئیسرائیل هۆشداری تووندیان ئاراستەی بزووتنەوەی حەماس کرد لەبارەی پابەندبوون بە ناوەڕۆک و خاڵەکانی ڕێککەوتننامەی ئاشتی بۆ غەززە، ڕۆژنامەیەکی ئەمریکی بڵاوی کردووەتەوە کە گەڕی دووەمی دانوستانەکانی نێوان حەماس و ئیسرائیل دەستپێدەکات.

وێنە گەورەکە: لەسەر پێشنیازی دۆناڵد ترەمپ و ئامادەکردنی پلانێکی 20 خاڵی، حەماس و ئیسرائیل ڕازی بوون بە ڕاگەیاندنی ئاگربەست و کۆتاییهێنان بە جەنگی دوو ساڵەی نێوانیان.

بڵاوکراوەی فەرمی: ڕۆژنامەی وۆڵ ستریت جۆرناڵی ئەمریکی بڵاویکردووەتەوە کە گەڕی دووەمی دانوستانەکانی نێوان بزووتنەوەی حەماس و ئیسرائیل لە میسر بەنێوەندگیری ئەمریکا دەستپێدەکات.

ئەمەش بزانە: دوای واژۆکردنی ڕێککەوتننامەی ئاشتی بۆ غەززە ئێستا دەستکراوە بە پاککردنەوەی شوێنە نیشتەجێبووەکان لە غەززە و پڕۆسەی دووبارە بوونیادنانەوەی غەززە، هاوکات بەشێک لە وڵاتانی جیهان ئامادەیی تەواوی خۆیان دەربڕیوە بۆ ئەوەی لە دووبارە بوونیادنانەوەی غەززە بەشداربن.