ئەو بەندکراوە فەڵەستینیەی بە "کەوچک" هەوڵی هەڵاتنیدا ئازادکرا

ئاڤا نیوز

دوای 34 ساڵ زیندانیکردن و جارێک لێدانی تونێل بە بەکارهێنانی کەوچکی نانخواردن، مەحمود عارزە یەکێک لە سەرکردە ناسراوەکانی حەماس ئازادکرا و لە یەکەم ژەمی نان خواردنیدا دەڵێت، ماوەیەکی زۆربوو بەکارهێنانی کەوچکم لێ قەدەغەکرابوو و ئەوە دوای ماوەیەکی درێژ، یەکەمجارە کەوچک دەبینم.

ببینە و ببیستە: دوای ڕێککەوتنی نێوان حەماس و ئیسرائیل، مەحمود عارزە یەکێک لە سزادراوە فەڵەستینییەکان بوو کە سەرەڕای ئەوەی بە زیندانی هەتاهەتایی حکومدرابوو، بەڵام ئازادکرا، دوای ئازادبوونیشی گرتەیەکی ڤیدیۆیی لە کاتی نانخواردندا بڵاوبووەتەوە و دەڵێت، دوای ماوەیەکی زۆر ئەوە یەکەمجارە کەوچک دەبینم، ئەوەش مانای وایە چوار ساڵ بووە مەحمود عارزە بۆ نانخواردن کەوچکی پێنەدراوە.

هۆکارە زانراوەکان: هۆکاری ئەو قسەیەی عارزە بۆ ئەوە دەگەڕێتەوە، ئەیلولی ساڵی 2021 هاوڕێ لەگەڵ پێنج زیندانیکراوی دیکەیدا بە بەکارهێنانی کەوچکی نانخواردن، لەناو زیندانی جەبلوعی ئیسرائیلدا تونێلێکیان لێدا و هەڵاتن، ئەوەش لە ئاستی جیهاندا کاردانەوەی زۆری لێکەوتەوە و وەک فەرماندەی "هەڵاتنە گەورەکە" ناوی برا، بەڵام زۆری نەبرد و دوای ئۆپەراسیۆنێکی فراوانی ئیسرائیل، دوای چەند ڕۆژێک دەستگیرکرانەوە.

باکگراوند: مەحمود عارزە ساڵی 1975 لە شاری جینینی کەناری ڕۆژئاوای فەڵەستین لەدایکبووە، کاتێک تەمەنی 14 ساڵان بوو بەتۆمەتی هێرشکردنەسەر هێزەکانی ئیسرائیل دەستگیرکراوە و دوای سێ ساڵ ئازادکراوە، دواتر چووەتەناو بەرەی مقاوەمەی فەڵەستینی و ساڵی 1996 دەستگیرکراوەتەوە و دادگای ئیسرائیل بە زیندانی هەتاهەتایی سزای بەسەردا سەپاند، ناوبراو یەكێک بووە لە سەرکردە زیندانیکراوە هەرە دیارەکانی حەماس.