وەزارەتی نەوتی عێراق ڕەتی دەکاتەوە نەوتی ئێرانی هەناردە کردبێت

ئاڤا نیوز

 

وەزارەتی نەوتی عێراق ئەو دەنگۆیانە ڕەتدەکاتەوە کە باس لەوە دەکەن عێراق نەوتی خاوی ئێرانی کڕیبێت و هەناردەی کردبێت، جەختیش لەوە دەکاتەوە  ڕێکارەکانی هەناردەکردن لەژێر کۆنترۆڵێکی تووند دایە.

 

ئەوەی لەبارەیەوە دەگوترێت: ماوەیەکی زۆرە باس لەوە دەکرێت بەهۆی سزاکانی سەر ئێران، عێراق نەوتی ئێرانی دەکڕێت و بەناوی نەوتی عێراقییەوە هەناردەی دەکات. 

 

ڕوونکردنەوەی فەرمی: وەزارەتی نەوتی عێراق لە ڕوونکردنەوەیەکەدا ئاماژە بۆ ئەوە دەکات "هەموو بڕی نەوتی خاوی عێراق بەپێی میکانیزم و ستانداردە نێودەوڵەتییەکان هەناردە دەکرێت کە گەرەنتی بەرزترین ئاستی شەفافییەت دەکات، بەو پێیەی نەوتەکە بە کۆمپانیا نێودەوڵەتییە ناسراوەکان دەفرۆشرێت کە خاوەن پاڵاوگەی باوەڕپێکراون".

 

- هاوکات وەزارەتەکە بە تووندی هەر تۆمەتێکی پەیوەست بە کڕین یان وەرگرتن یان دووبارە هەناردەکردنەوەی بڕی نەوتی خاوی ئێران ڕەتدەکاتەوە و جەخت لەوە دەکاتەوە کە کارەکانی هەناردەکردن کەوتووەتە ژێر کۆنترۆڵی تووندەوە.