وادەی تۆماركردنی لیست و قەوارە  سیاسییەكانی هەرێمی كوردستان دیاریكرا

ئاڤا نیوز

کۆميسیۆنی باڵای سەربەخۆی هەڵبژاردنەکانی عێراق، داوا لەو لایەنە سیاسییەکانی  کوردستان دەکات، هەر لایەنێک دەیەوێت بەشداری لە هەڵبژاردنی خولی شەشەمی پەرلەمانی کوردستان بکات، دەبێت لە ماوەی 10 ڕۆژدا خۆیان تۆمار بکەن.

وێنە گەورەکە: ئەمڕۆ یەکشەممە 03-03-2024 نێچیرڤان بارزانی، سەرۆکی هەرێمی کوردستان لە فەرمانێکدا پاڵپشت بە بڕگەی دووەم لە ماددەی دەیەم لە یاسای سەرۆکایەتیی هەرێمی کوردستان ژمارە یەکی ساڵی 2005 هەموارکراو، 10-06-2024 بە وادەی ئەنجامدانی هەڵبژاردنی گشتی بۆ خولی شەشەمی هەڵبژاردنی پەرلەمانی کوردستان دیاریکرد.

لێدوانی فەرمی: جومانە غەلای، گوتەبێژی کۆمیسیۆنی باڵای سەربەخۆی هەڵبژاردنەکانی عێراق بۆ ئاڤا نیوز گوتی: پڕۆسەی تۆمارکردنی لیست و قەوارە سیاسییەکان لە 05-03-2024 دەستپێدەکات، تاوەکو 14-03-2024، وادەکە درێژ ناکرێتەوە. 

ئەمەش بزانە: پڕۆسەی تۆمارکردنەکە لە فەرمانگەی حیزب و ڕێکخراوە سیاسییەکان لە بەغدا و ئۆفیسی کۆمیسیۆن لە پارێزگاکانی هەرێمی کوردستان دەکرێت.