كۆمەڵەی مۆلیدە ئەهلیەکانی دهۆک: 10ی مانگ دوایین وادەیە

ئاڤا نیوز

كۆمەڵەی مۆلیدە ئەهلیەکانی پارێزگای دهۆک هۆشداری بە خەڵک دەدات و ڕایدەگەیێنێت، ئەو کەسانەی تا ئێستا پارەیان نەداوە، دوایین ڕۆژ بۆیان 10ی ئەم مانگەیە، ئەگەر لەم ڕێکەوتە پارەیان نەدا، كارەبایان لەسەر دەبڕن. 

ڕاگەیێنراوی فەرمی: کۆمەڵەکە ڕایگەیاند: زۆبەی ئەو کەسانەی پارەیان نەداوە لەو گەڕەکانەن کە كارەبایان بووەتە 24 کاتژمێری. تەنیا دوو ڕۆژیش مۆڵەتیان لەبەردەمە بۆ ئەوەی پارەکە بدەن.

لیدوانی فەرمی: ئەم هەڕەشەیە کاردانەوەی توندی بەدوای خۆدا هێنا، دادوەر حەكیم دوسكی، داواکاری گشتی  قەزای سێمێڵ لە وەڵامی كۆمەڵەی مۆلیدە ئەهلییەکانی پارێزگای دهۆک دەڵێت:

- یەکەمجار ئێوە مافی ئەو خەڵکە بدەن پاشان داوای  مافی خۆتان بكەن.

- مۆلیدەکانتان بێدەنگ بکەن، دووکەڵی مۆلیدەکان مەهێڵن و ژینگە پیس مەكەن، دواتریش  مۆلیدەکانتان ببنە  دەرەوەی گەڕەکەکان، گازی پیس بەکارمەهێنن.

- پارەی كرێكارەکانی مۆلیدەکانتان مەخەنە  سەر حسابی نرخی ئەمپێرەکان، لە کاتی خۆی دا مۆلیدەکان هەڵکەن و لە هەمانکاتیش دا دەستکاری ڤۆلتیی مۆلیدە مەكەن و کارەبا کەم مەکەنەوە.

- داواکاری گشتی سێمێڵ  هەڕەشەی ئەوەش دەکات، ئەگەر كۆمەڵەی مۆلیدە ئەهلییەکان پابەندی ئەم داواکاریانە نەبن، سكاڵایان لەسەر  تۆمار دەکرێت و ڕوبەڕووی یاسا دەکرێنەوە.

لەلایەکی دیکەوە: حاجی داخاز شەرەف، جێگری کۆمەڵەی مۆلیدە ئەهلییەکانی دهۆک بە ئاڤای وت:

- چوار هەزار هاوبەش قەرزاری ئێمەیە و بڕی پارەکەش زۆرە، ئامادەش نین ئەو قەرزەمان بۆ بگەڕێنەوە.

- داوامان لە قایمقایم و کارەبای گشتی دهۆک کردەوە ئەو کێشەیەمان بۆ چارەسەر بکەن، کەچی بە ئێمە دەڵێن کێشەی ئێوە عایدی ئێمە نییە و هیچمان پێ ناکرێت، تەنانەت داوامان لە خودی پارێزگاریش کردووە، ئەویش وڵاممان ناداتەوە.

چارەسەرەکان: پێشنیازیان بۆ کردوون بچن لە دادگا سکاڵایان لەسەر تۆمار بکەن، حاجی داخازیش دەڵێ، ئەوە چارەسەری بابەتەکە ناکات،لەبەرئەوەی چۆن سكاڵا لەسەر چوار هەزار کەس تۆمار بکەین.