لە سنووری ڕووسیا گەنجێکی کورد دەکوژرێت و 25 یش دەستگیر دەکرێن

ئاڤا نیوز

هەفتەی ڕابردوو لەسەر سنووری نێوان بیلاڕووسیا و لاتڤیا هاونیشتمانییەکی کوردی خەڵکی قەرەداغ بە دەستی کۆماندۆی لاتیڤیا دەکوژرێت.

وێنە گەورەکە: چەند ساڵێکە بەشێک لە خەڵک بۆ گەیشتن بە وڵاتانی یەکێتی ئەوروپا، ڕێگای ڕووسیا و بیلاڕووسیا بەکاردەهێنن. بە یەکێک لە ڕێگا مەترسیدارەکان دادەنرێت.

چیرۆکی سەرەکی: د.دانەر ئەبوبەکر، لە نوێنەرایەتی حکومەتی هەرێمی کوردستان لە ڕووسیا دەڵێت: هەفتەی پێشوو، چەند گەنجێک کە ژمارەیان زیاتر لە 25 کەس بووە و سەرجەمیان خەڵکی هەرێمی کوردستان بوون، ویستویانە لە ڕێگای بیلاڕووسیا بپەڕنەوە بۆ لاتڤیا، بەڵام لەسەر سنوور کۆماندۆی لاتڤیا دەستگیریان دەکات و ئازایان دەدات، یەکێک لەو گەنجانە ناوی محەممەد فەرحانە و خەڵکی قەرەداغە بە هۆی ئازارەوە گیان لەدەستدەدات و ئەوانی تریش دەنێردرێنەوە بۆ بیلاڕووسیا. ئێستا گەنجەکان لە بیلاڕووسیا دەستبەسەرن و تەرمی محەممەدیش هەر لەوێیە.

بەدواداچوونی زیاتر: ئاڤا پەیوەندی بە یەکێک لە خێزانی ئەو 25 گەنجە کرد کە لە بیلاڕووسیا دەستگیرکراون و وتی، باڵیۆزخانەی عێراق لە ڕووسیا ئاگادار کراوەتەوە و بڕیارە لەم مانگە دیپۆرت بکرێنەوە.

لەلایەکی دیکەوە: گەنجێکی سلێمانی لە فڕۆکەخانەی مۆسکۆ، داواکاری گەیاندووەتە ئاڤا و دەڵێت: دوو ڕۆژە لە فڕۆکەخانەی مۆسکۆ ڕاگیراوم و 12 کەسی دیکەیشم لەگەڵە کە خەڵکی شارەکانی دیکەی عێراقن، ڤیزامان هەیە و بەشێوەیەکی یاسایی دەمانەوێت بچینە ڕووسیا، بەڵام ئەوان دەڵێن دیپۆرتتان دەکەینەوە.

بۆ کێشەی ئەم گەنجە ئاڤا لەگەڵ نوێنەرایەتی حکومەتی هەرێمی کوردستان لە ڕووسیا قسەی کردووە، ئەوان دەڵێن: ئەم کێشەیە ڕۆژانە ڕووبەڕووی هاوڵاتییانی عێراق و کوردستان دەبێتەوە، لەبەرئەوەی خەڵکێکی زۆر ڤیزای ڕووسیا بەکاردەهێنن بۆ چوونە ئەوروپا، ڕێکارەکانی چوونە ناو ڕووسیا توندە، بۆیە وەک نوێنەرایەتی حکومەتی هەرێمی کوردستان ناتوانین بەرپرسیاریەتی یاسایی ئەم دۆخە هەڵبگرین، چونکە نازانین ئەوانەی دێن بۆ ڕووسیا بە چ ئامانجێک دێن.