لە عێراق دابەشكردنی مووچەی مانگی یەک دوا دەکەوێت

ئاڤا نیوز

لە عێراق دابەشكردنی مووچەی مانگی یەك دواكەوتووە، تا ئێستا تەنیا مووچەی بەشێک لە دەزگا ئەمنیی و سەربازییەكان دابەشكراون، لەگەڵ بەشێک لە هێزە ئەمنییەكانی سەر بە وەزارەتی ناوخۆ.

چیرۆکی سەرەکی: لە عێراق دابەشكردنی مووچەی مانگی یەک لە ڕۆژی 22ـی مانگەوە واتە بەر لە هەفتەیەک دەستیپێكردووە، بەڵام ئاڤا زانیویەتی تا ئێستا تەنیا مووچەی دەزگا سەربازی و بەشێكی دەزگا ئەمنییەكان دابەشكراون، وەزارەتە مەدەنییەكان تا ئێستا مووچەیان وەرنەگرتووە، تەنانەت بەشێكی زۆری كارمەندانی وەزارەتی ناوخۆش مووچەیان پێنەدراوە.

زانیاریی بەدەستهاتوو: بەپێی زانیارییەکانی ئاڤا، ئەمڕۆ چوارشەممە پارە بۆ دابەشکردنی مووچەی فەرمانبەرانی مەدەنی تەمویل کراوە، بڕیارە دابەشكردنی لە ڕۆژانی داهاتوو دەستپێبکات.

دوێنێ سێشەممە، وەزارەتی دارایی و ئابووریی هەرێمی كوردستان، لیستی مووچە و میزان موراجەعەی ڕەوانەی بەغدا كرد، ئەمڕۆش ڕادەستی وەزارەتی دارایی کرد، دوای ئەوەی وەزارەتی دارایی عێراق بە نووسراوی فەرمی داوای لیستی مووچەی لە حكومەتی هەرێمی كوردستان كرد.

ئەوەی پێویستە بیزانیت: دواكەوتنی مووچە لە عێراق پەیوەندی هەیە بە ئەنجامدانی چەند ڕێكارێكی دارایی و كارگێڕی لەلایەك و تەواوكردنی قۆناغی كۆتایی تۆماركردنی ناوی فەرمانبەران و خانەنشینانی نوێ لە سیستەمی پەیڕۆڵ لەلایەكی دیكەوە، جگە لە ڕێكارەكانی وردبینی لە زانیارییە نوێیەكان كە تازە داخڵی سیستەمی پەیڕۆڵ كراون.