ئاڕ تی بانک دواكه‌وتنى مووچه‌ بۆ مووچه‌خۆران چاره‌سه‌ر ده‌كات

ئاڤا نیوز

 

بانکێکی بەشدار لە پرۆژەی "هەژماری من"، بۆ یەکەمجار پلانێکی نەوعی لە بەرژەوەندی مووچەخۆران دادەنێت و وەکو ڕێزێک بۆ ئەو کەسانەی بانکەکەیان هەڵبژاردووە بۆ وەرگرتنی مووچەکانیان، بەر لە هەموو مووچەخۆرێکی کوردستان بەشێک لە مووچەکانیان وەردەگرن ئەگەر وادەی گەیشتنی پارە لە بەغداوە دواکەوت.

 

چیرۆکی سەرەکی: بانکی ئاڕ تی بانک، لە دەستپێشخەرییەکی نوێدا، بڕیاری داوە ئەگەر هەر مانگێک مووچە دواکەوت، ئەوا خۆی 30% مووچەی هەر مووچەخۆرێک بدات، هەتا حکومەتی عێراق مووچە دەنێرێت، ئەوکات لە مووچەخۆرانی وەردەگرێتەوە، بەبێ ئەوەی هیچ زیادەیەک یان خێرێک بخاتە سەر ئەو بڕە پارەیە وەری دەگرێتەوە.

 

زانیاری زیاتر: بۆ نموونە وا کۆتایی مانگە و هێشتا حکومەتی عێراق بڕیاری خەرجکردنی مووچەی مانگی یەکی نەداوە، بۆ ئەوەی مووچەخۆران کە بەشداریی خزمەتگوزارییەکانی ئەو بانکەیان کردووە تووشی بێ پارەیی و قەرزکردن لە خەڵکی تر نەبن و بەشی خەرجی ڕۆژانە پارەیان پێ بمێنێت، ئەوا ئاڕ تی بانک لە سەرەتای مانگ، واتا ڕۆژی 1ـی 2 بڕی 30% مووچەی هەر مووچەخۆرێک دەخاتە سەر حیسابەکەی و مووچەخۆران دەتوانن بچن پارەکە ڕابکێشن.

 

ڕوونکردنەوەی زیاتر: ئەگەر فەمانبەرێک یان خانەنشینێک، مووچەکەی یەک ملیۆن دینار بێت، ئاڕ تی بانک بڕی 300 هەزار دینار دەخاتە سەر ئەژمارەکەی، ئینجا دواتر کە بەغدا مووچەکەی نارد، بۆنموونە ڕۆژی 10ـی 2 مووچەی مانگی یەک دەنێرێت، ئەوکات ئار تی بانک 300 هەزارەکەی خۆی دەگێڕێتەوە و 700 هەزارەکەی تر دەداتە مووچەخۆرەکە.

 

ڕێکارەکان: کاتێک مووچەخۆرێک لە 30% مووچەکەی وەرگرت، پاش ئەوەی کۆی مووچەکەی دێتە سەر ئەژمارەکەی، بانکەکە تەنها 10%ـی پارەکە وەردەگرێتەوە و ئەگەر هەتا 45 ڕۆژ پارەکە گەڕێنرایەوە بۆ بانکەکە، هیچ عمولەیەک وەرناگیرێت، لەدوای ئەو کاتەوە بڕی لە 2.75% عمولەی دەچێتە سەر.

 

هەروەها مووچەخۆرەکان بۆ سوودمەند بوون لەم خزمەتگوزارییە دەبێت کریدت کارت دەربهێنن بە 75 هەزار دینار و بە کارتی وەرگرتنی مووچە ناتوانن سوودمەند بن لەو خزمەتگوزارییە.

 

لێدوانی تایبەت: سەرچاوەیەکی باڵا لە ئاڕ تی بانک بە ئاڤای ڕاگەیاند، خەریکی ئامادەکارین و بەنیازین لە دوو مانگی داهاتوودا ئەو دەستپێشخەرییە جێبەجێی بکەین (کە لە پێشەوە ئاماژەی پێکرا).

 

خزمەتگوزاریی زیاتر: ئاڕ تی بانک چەند خزمەتگوزارییەکی تریشی زیاد کردووە بۆ ئەو مووچەخۆرانەی حیسابیان لای ئەوان هەیە، کە پێی دەوترێت خزمەتگوزاری پاشەکەوت و وەبەرهێنان.

 

هەر مووچەخۆرێک یان کەسێک حیسابی لە ئاڕ تی بانک هەبێت و پارەکەی لەسەر حیسابەکەی بهێڵێتەوە و ڕاینەکێشێت، لە ماوەی شەش مانگ سەدا 3ی قازانج و لە ماوەی ساڵێک سەدا 7 قازانجی دەچێتە سەر، بۆنموونە  مووچەخۆرێک 10 ملیۆن دینار لە ئاڕ تی بانک دادەنێیت، لە ماوەی یەک ساڵدا 700هەزار دیناری دەچێتە سەر.

 

بەنیازیشن بۆ کارئاسانی زیاتری مووچەخۆران، بەمزووانە ئەپڵیکەیشنێکی نوێ و پێشکەوتوو بە زمانی کوردی و زمانەکانی دیکە بخەنە کار و تیایدا سەرجەم ئۆفەر و تایبەتمەندیی و خزمەتگوزارییەکان بخرێنەڕوو، هەروەها وەڵامی داخوازیی هاوڵاتیان ئاسانتر بکەن.

 

باکگراوند: بانکی ئاڕ تی (RT Bank) یان "بانکی بازرگانیی هەرێم" (Region Trade Bank)، یەکێکە لە بانکە تایبەتە چالاک و پێشەنگەکان لە هەرێمی کوردستان و عێراق، یەکێکە لە هەشت بانکە بەشدارەکەی پڕۆژەی "هەژماری من" و لەسەر ئاستی عێراق و کوردستان خاوەنی چەندین خەڵات و ڕێزلێنانە لەبوارەکانی شەفافیەت و بڵاوکردنەوەی داتا داراییەکانی لەلایەن دەستەی کاغەزە داراییەکانی عێراق.