ساڤایا نامەیەکی نهێنی دەداتە چوارچێوەی هەماهەنگی

ئاڤا نیوز

مارک ساڤایا، نێردەی تایبەتی سەرۆکی ئەمریکا بۆ کاروباری عێراق، نامەیەکی نهێنی ڕادەستی سەرکردەکانی چوارچێوەی هەماهەنگی دەکات، تێیدا واشنتن مەرجی هەڵوەشاندنەوەی گرووپە چەکدارەکان و دوورخستنەوەی مالیکی دەخاتە بەردەم چوارچێوەکە.

زانیاریی بەدەستهاتوو: بەگوێرەی ڕاپۆرتێک کە ڕوژنامەی عەینی ئیماراتی بڵاوی کردووەتەوە، واشنتن خشتەیەکی زەمەنیی (6 بۆ 12 مانگ)ـی دیاری کردووە بۆ هەڵوەشاندنەوەی گرووپە چەکدارەکانی نزیک لەئێران و داماڵینی تەواوەتیی چەکەکانیان، ئەمەش مەرجی سەرەکی و بنەڕەتیی هەر هاوبەشییەکی داهاتووە، هۆشداریشی داوە کە مانەوەی ئەو گرووپانە لە دەرەوەی یاسا، هەڕەشەیەکی ڕاستەوخۆیە بۆ سەر ئاسایشی ناوچەکە و سەقامگیری عێراق.

ڕۆژنامەکە دەڵێت" ساڤایە لەنامەکەی دا بە نەرێنی ئاماژەی بە سەردەمی دەسەڵاتی نووری مالیکی، سەرۆکوەزیرانی پێشووتری عێراق کردووە و بە قۆناغی گرژی و ناسەقامگیری ناوی بردووە، ئەمەش هاوتەریبە لەگەڵ هەڵوێستە تووندەکەی دۆناڵد ترەمپ، سەرۆکی ئەمریکا، کە کاندیدکردنی مالیکی ڕەتکردووەتەوە و ڕایگەیاندووە گەڕانەوەی ئەو بە واتای بێبەشکردنی عێراق لە پشتگیرییەکانی ئەمریکا و گەڕانەوەی وڵات بۆ ناو بازنەی هەژاری و پشێوی دێت.

بۆچوونی لایەنی بەرامبەر: سەرچاوەیەک لە چوارچێوەی هەماهەنگیی بۆ عەینی ئیماراتی ئاشکرای کردووە، ئەم هەڵوێستە تووندەی ئەمریکا و بەتایبەت لێدوانەکانی ترەمپ، دانوستانە سیاسییەکانی ئیفلیج کردووە.