بانكێکی بەشدار لە هەژماری من ستایش دەکرێت

 

ئاڤا نیوز

ستایشکردنی بانکە بەشداربووەکانی هەژماری من هۆکارە بۆ بەهێزبوونی متمانەی وەبەرهێنەران و بەشداربووانی پرۆژەی هەژماری من.

وێنە گەورەکە: ئاڕتی بانک وەک یەکێک لە بانکە بەشدارەکان لە پرۆژەی هەژماری من بەهۆی شەفافیەت و بڵاوکردنەوەی داتا داراییەکانی لەلایەن دەستەی کاغەزە داراییەکانی عێراق ستایش دەکرێت.

ڕاگەیێنراوی فەرمی: ئاڕتی بانک لە بڵاوکراوەیەکدا ئاماژە بەوە دەکات "لە چوارچێوەی پابەندبوونمان بە شەفافیەتی دارایی و باشترکردنی متمانە لەگەڵ وەبەرهێنەران و خاوەن پشکەکان، بە خۆشحاڵییەوە ئاگادارتان دەکەینەوە کە بانکەکەمان بەیاننامە داراییەکانی بۆ ساڵی 2024 پێشکەش کردووە. ئەمەش لەچوارچێوەی هەوڵە بەردەوامەکانماندایە بۆ پابەندبوون بە ستانداردی دارایی و دروستکردنی پەیوەندییەکی بەهێز لەسەر بنەمای شەفافیەتی کاکردن. بەم پێیە دەستەی كاغەزە داراییەكانی عێراق پەیامی سوپاس و پێزانینی ئاراستەی بەڕێوەبەرایەتی بانکەکەمان کرد.

ئەوەی پێویستە بیزانیت: بانکەکە یەکێکە لەو پێنج کۆمپانیایەی لەسەر ئاستی عێراق لەلایەن دەستەی کاغەزە داراییەکانی عێراقەوە بەهۆی شەفافیەت و خستنەڕووی داتا و زانیارییە داراییەکانی ستایش دەکرێت.

بابەتە ستراتیژیەکان: شەفافیەت و بڵاوکردنەوەی داتا داراییەکان لەلایەن بانکەکانی بەشدار لە هەژماری من هۆکارە بۆ بەهێزبوونی سیستمی بانکی و زیادبوونی متمانەی بەشداربووان لە کەرتی بانکی هەرێمی کوردستان.