دواین دەرفەت بە فەرمانبەران و خانەنشینان دەدرێت بۆ پڕکردنەوەی هەژماری من

ئاڤا نیوز

سبەی دووشەممە دوایین دەرفەتە بۆ فەرمانبەران و خانەنشینان بۆ پڕکردنەوەی فۆرمی هەژماری من، لەبەرئەوەی پێشتر وەزارەتی دارایی کوردستان ڕایگەیاندبوو هەر فەرمانبەر و خانەنشینێک تا 20-1-2026 فۆرمی هەژماری من پڕنەکاتەوە مووچەکەی ڕادەگیرێت تاوەکو خۆی تۆمار دەکات.

 

چیرۆکی سەرەکی: تیمی ئاڤا پەیوەندیی بە وەزارەتی دارایی کوردستان و تیمی هەژماری من کرد، وتیان سبەی دووشەممە داتای فەرمانبەران و خانەنشینان کۆدەکەینەوە بزانین چەند هەزار مووچەخۆر ماون خۆیان تۆمار بکەن، ئینجا لەسەر بنەمای ژمارەی مووچەخۆران بڕیار دەدەین ئایا مۆڵەتەکە درێژ بکەینەوە یان نا؟

 

زانیاری زیاتر: بەپێی زانیارییەکانی ئاڤا میدیا تاوەکو ئێستا دەیان هەزار فەرمانبەر و خانەنشین ماون فۆرمی هەژماری من پڕبکەنەوە، لەبەر ژمارەی زۆری مووچەخۆران بڕیارە وادەکە درێژ بکرێتەوە و دەرفەتێکی تریان پێبدرێت، بەڵام ئەمە دوایین دەرفەتە و وەزارەتی دارایی کوردستان جددیە لەم بابەتە، ئەمەش لەسەر داواکاری وەزارەتی دارایی عێراقە، نابێت هیچ مووچەخۆرێک بمێنێت ئەژماری بانکی نەبێت.

 

باکگراوند: 'هەژماری من' یەكێكە لە پڕۆژە ستراتیژییەكانی كابینەی نۆی حكومەتی هەرێمی كوردستان و ئامانج لێی؛ كۆتاییهێنانە بە دابەشكردنی مووچە بەشێوەی كاش و بە دیجیتاڵیكردنی مووچەی فەرمانبەرانی هەرێمی كوردستان لەپێناو سوودمەندبوونیان لە خزمەتگوزارییە بانكییەكان و بەئاسان وەرگرتنی مووچەكانیان، هەر بۆیە بەپێی بڕیاری حکومەتی عێراق لە ساڵی 2026 دەبێت هەموو مووچەخۆرانی هەرێمی کوردستان ببنە خاوەنی ئەژماری بانکی، ئەوەش لەڕێگەی خۆ تۆمارکردن لە پڕۆژەی ئەژماری من.