زیاتر لە 430 پێشمەرگە نۆ مانگە چاوەڕێی دەستبەکاربوون دەکەن

ئاڤا نیوز

 

زیاتر لە ساڵێکە پێشمەرگەکانی لیوای 20 لە هەرێمی کوردستان چوونەتە ڕاهێنان، بەڵام بەشێکیان ماونەتەوە و سەرەڕای جێبەجێکردنی سەرجەم ڕێکارەکان، هێشتا نە مووچەیان وەرگرتووە نە دەستبەکاربوونیان بۆ کراوە، ئێستاش چاوەڕێی دەستبەکاربوون دەکەن.

 

وێنە گەورەکە: ئەو پێشمەرگانە مانگی 9ی 2023 لە وەزارەتی پێشمەرگە چاوپێکەوتنیان کرد، سێ هەزار و 777  کەس لە 02-12-2023 چوونە ڕاهێنان و 430 کەس ماونەتەوە، دواتر و 15ـی 07 ـی 2024 وەزارەتی پێشمەرگە چەند ناوێکی دیکەی بڵاوکردەوە، کە ئەو 430 کەسە بوون، دواتر چوونەتە دیالە و چاوپێکەوتنیان کرد و بایۆمەتریشیان تەواو کردووە، تەنانەت لە دەنگدانی تایبەت بەشدارییان کردووە و دەنگیان داوە، بەڵام نە مووچەیان بۆ بەستراوە نە ڕاهێنانیان پێکراوە.

لێدوانی فەرمی: ئاڤا لەبارەی کێشەی ئەو پێشمەرگانە قسەی لەگەڵ وەزارەتی پێشمەرگە کردووە، لە وەڵامی پرسیاری ئاڤا، وەزارەتی پێشمەرگە ڕایگەیاند، "کەیسەکەیان ڕەوانەی وەزارەتی بەرگری عێراق کراوە و لەوێ وەستاوە".

زانیاریی زیاتر: مەریوان قەرەنی، ئەندامی لیژنەی ئاسایش و بەرگریی له‌ په‌رله‌مانی عێراق نووسراوێکی بۆ وەزیری بەرگریی عێراق کردووە و داوای تێهەڵچووونەوە بە کەیسی ئەو پێشمەرگانە دەکات کە بەبێ هۆکار تا ئێستا دەستیان بە ڕاهێنان نەکردووە و مووچەکانیان نەبەستراوە.