فەڕەنسا بەکار‌هێنانی جگەرەی ئەلیکترۆنی 'یەکجار بەکارهێنراو' قەدەغە دەکات

ئاڤا نیوز

 

پەرلەمانی فەڕەنسا بەکۆی دەنگی ئامادەبووانی بڕیاریدا بە قەدەغەکردنی 'جگەرەی ئەلیکترۆنی یەکجار بەکارهێنراو'، بەمەش دەبێتە دووەم وڵاتی ئەوروپا کە ئەو جۆرە جگەرەیە قەدەغە بکات. 

 

چیرۆکی سەرەکی:  لە ماوەی سێ ساڵی رابردوودا، ژمارەی بەکار‌هێنەرانی جگەرەی ئەلیکترۆنی لە نێو منداڵ و نەوجەواناندا بۆ سێ ئەوەندە زیادیکردوو، بەتایبەت نەوجەوانانی تەمەنی نێوان 11-15 ساڵی كە 90٪ یان جگەرەی ئەلیکترۆنی بەکاردەهێنن،  کە ئەمەش بە دەروازەی ئاڵوودەبوون بە تووتن دادەنرێت بۆ هەرزەکاران و زیانبەخشیشە بۆ ژینگە.

 

زانیاریی زیاتر: پڕۆژە یاسای قەدەغەکردنی بەکار‌هێنانی جگەرەی ئەلیکترۆنی یەکجار بەکارهێنراو لەلایەن ئەنجوومەنی پیرانی فەرەنساوە پەسندکراوە، دوای بەلجیکا دەبێتە دووەم وڵاتی ئەوروپا کە قەدەغەکردنێکی لەو شێوەی خستووەتە بواری جێبەجێکردنەوە.

 

مەترسییە پێشبینیکراوەکان: ئەو جۆرە جگەرە ئەلکترۆنییە بە بە "پف" ناسراوە، بەکارهێنانێکی بەرچاوی هەیە لەناو گەنجان و هەرزەکاران، ئەمەش بەهۆی بەردەستبوونی لە هەموو مارکێتەکان و هەرزانی نرخەکەی کە بەچەندین تام و بۆنی جیاواز بانگەشەی سەرنجڕاکێشی بۆ کراوە، ئەمەش لەداهاتوودا دەبێتە هۆی دروستبوونی چەندین نەخۆشی مەترسیدار لەنێو گەنجان. 

 

لێدوانی فەرمی: پەرلەمانتار فرانسیسکا پاسکوینی، بە ئاژانسی فرانس پرێسی ڕاگەیاندووە،" ئەمە سەرکەوتنێکی گەورەی دوولایەنەیە، بەوەی هەم ژینگە دەپارێزین لە پیسبوون بە پاتری ناو ئەو جگەرانە و هەم تەندروستی منداڵەکانیشمان دەپارێزین.

 

ئەوەی لەبارەیەوە دەگوترێت: دەسەڵاتدارانی تەندروستی لە فەرەنسا و بەلجیکا دەڵێن، بەکارهێنانی درێژخایەنی نیکۆتین بە تایبەتی زیانی بۆ مێشکی هەرزەکاران هەیە و دەتوانێت هاندەری بەکارهێنانی دەرمانی دیکەش بێت.

 

باکگراوند: لە ساڵی  2024، بەلجیکا وەکو یەکەم وڵاتی ئەوروپا، یاسای بەکارهێنانی جگەرەی ئەلیکترۆنی یەکجار بەکارهێنراوی پەسند کرد.