مانەوەی چەکدارە بیانییەکان کێشە بۆ عێراق دروست دەکەن

ئاڤا نیوز

سیاسەتمەدار و شرۆفەکارانی سیاسی هۆشداری بەمانەوەی هەزاران چەکداری بیانی لەنێو خاکی عێراق دەدەن و دەڵێن، بەشێکی زۆر لەو چەکدارانە لە لیستی تیرۆردا پۆلێنکراون.

وێنە گەورەکە: دوابەدوای ڕووخانی ڕژێمی بەشار ئەسەد، سەدان چەکداری بیانی ئەفغانی و ئێرانی و پاکستانی کە پاڵپشتی هێزەکانی ئەو ڕژێمەیان دەکرد، لە سووریاوە بەرەو خاکی عێراق کشاونەتەوە و لە سنوری شاری قائیم جێگیرکراون.

لێدوانی فەرمی: عەدنان زورفی، پەرلەمانتار و ئەمینداری گشتی بزووتنەوەی "ئەلوەفا"ـی عێراقی لە پۆستێکیدا لە پلاتفۆرمی (X) نووسیویەتی:

- حکومەتی عێراق ئەو هێزە چەکدارە بیانییانە لەخۆدەگرێت کە ناویان لە لیستی تیرۆری جیهانیدا پۆلێنکراوە و تەنانەت وڵاتەکانی خۆشیان ئامادەنین وەریانگرنەوە.

- ئەو هێزە چەکدارانە لە سەربازگە فەرمییەکانی حکومەت جێگیرکراون، ئەمەش هەڕەشەیەکی مەترسیدار بۆ سەر ئاسایشی نەتەوەیی عێراق دروست دەکات.

لەلایەکی دیکەوە: نەزار حەیدەر، شرۆڤەکار و سیاسەتمەداری عێراقی نیشتەجێی ئەمریکا ڕایگەیاند: پێویستە حکومەتی عێراق بەزووترین کات  چەکی ئەو هێزە چەکدارانە داماڵێت و ئەندامەکانیان دەستبەسەر بکات تا ئەو کاتەی چارەسەرێک بۆ گەڕانەوەیان دەکرێت.