سەنتەری نێودەوڵەتی فەلەکناسی یەکەم ڕۆژی مانگی ڕەمەزانی 2025 دیاری دەکات

ئاڤا نیوز

سەنتەری نێودەوڵەتی فەلەکناسی، پێشبینی دەکات سەرەتای مانگی ڕەمەزانی پیرۆز بکەوێتە یەکەم ڕۆژی مانگی ئازاری داهاتووەوە.

ئەوەی پێویستە بیزانیت: بەپێی ساڵنامەی زاینی، مانگی ڕەمەزانی پیرۆز هەموو ساڵێک 10 ڕۆژ پێشدەکەوێت، تەنیا بەبینینی مانگ دیاری دەکرێت، بۆیە لەزۆربەی وڵاتانی ئیسلامی لیژنەیەکی تایبەت بۆ بینینی مانگ لە کەسایەتی ئایینی و فەلەکناسی پێکدەهێنرێت.

لێدوانی فەرمی: محەممەد شەوکەت عۆدە، بەڕێوەبەری سەنتەری نێودەوڵەتی فەلەکناسی ڕایگەیاند: یەکەم ڕۆژی مانگی ڕەمەزانی پیرۆز یەکی ئازاری 2025 دەسپێدەکات، چونکە بەرەبەیانی 27ـی شوبات مانگ ئاوادەبێت، بەرەبەیانی ڕۆژی دواتر مانگ نوێ دەبێتەوە.

ڕاگەیێنراوی فەرمی: لەوبارەیەوە ماڵپەڕی سەنتەری نێودەوڵەتی فەلەکناسی ئاماژەی بە پێشبینییە فەلەکییەکانی زانایانی جیهانی ئیسلامی کردووە و بڵاوی کردووەتەوە، یەکی مانگی ڕەمەزانی 1446ـی کۆچی دەکاتە یەکی ئازاری2025، لەو ڕۆژەدا مانگ دەبینرێت.