وەزارەتی دارایی عێراق: دەست بەدابەشکردنی مووچەی مانگی دوو دەکرێت

ئاڤا نیوز

 

وەزارەتی دارایی عێراق ڕایگەیاند، دەست بەدابەشکردنی مووچەی مانگی دووی فەرمانبەرانی عێراق کراوە و ئەو دەنگۆیانەش ڕەتدەکاتەوە کە باس لە کورتهێنان یاخود کێشە لە سیولەی دارایی هەبێت. 

 

ڕاگەیێنراوی فەرمی: وەزارەتی دارایی عێراق ڕایگەیاند:

-    فەرمانگەی ژمێریاری لە وەزارەتی دارایی  دەستیکرد بە خەرجکردنی مووچەی فەرمانبەرانی دەوڵەت بۆ مانگی شوبات.

-    وەزارەت پابەندبوونی خۆی بە خەرجکردنی شایستە داراییەکانی فەرمانبەر، خانەنشین و سوودمەندانی چاودێریی کۆمەڵایەتی دووپات دەکاتەوە بەپێی خشتەی کاتی دیاریکراو بێ هیچ دواخستن یان کەمی پارە.

-    بەتەواوی ڕەتیدەکەینەوە هیچ کورتهێنانێکی دارایی هەبێت کاریگەریی لەسەر خەرجکردنی مووچە هەبێت، بەردەوام دەبین لەکارکاردن بۆ مسۆگەرکردنی سەقامگیریی سیاسەتی دارایی و دابینکردنی شایستەکان بەگوێرەی ئەوەی پلانی بۆ داڕێژراوە.

زانیاریی زیاتر:  دوای ئەوەی نووسینگەی سەرۆکوەزیرانی عێراق داوای بەهەمیشەییکردنی بەشێک لەفەرمانبەرانی گرێبەست لەوەزارەتی کارەبا دەکات، وەزارەتی دارایی عێراق بە نووسراوی ژمارە 468، کە لە رۆژی 9-2-2025 لەلایەن تەیف سامییەوە واژۆی لەسەر کراوە، وەڵامی ئەو نووسراوە دەداتەوە ئاشکرای دەکات کە لەم کاتەدا  گەنجینەی دەوڵەت کێشەی گەورەی مسۆگەرکردنی مووچەی فەرمانبەران و خانەنشینان و چاودێری کۆمەڵایەتی هەیە، ناتوانرێت ئەو فەرمانبەرانە بەهەمیشەیی بکرێن.