لەسەر زمانی کوردی سکاڵا لەسەر وەزیری دادی عێراق تۆمار دەکرێت

ئاڤا نیوز

 

بڕیارە ڕۆژی 19ـی ئەم مانگە دادگای فیدڕاڵی دادبینی بۆ سکاڵایەک بکات کە لەسەر وەزیری دادی عێراق تۆمارکراوە و داوا دەکرێت زمانی کوردی بۆ ڕۆژنامەی وەقائعی عێراقی زیاد بکرێت.

 

وێنە گەورەکە: هاووڵاتیەک بەناوی خالید مستەفا حوسێن لە سکاڵاکەیدا چوار داواکاری خستوەتە بەردەست دادگای فیدڕاڵی و داوا دەکات بەدەر لە زیادکردنی زمانی کوردی، ئەو ژمارانەی کە پێشتر ڕۆژنامەکە بڵاوی کردووەتەوە وەربگێڕدرێتە سەر زمانی کوردی و لە ماوەیەکی دیاریکراودا تەواو بکرێن و بڵاوبکرێنەوە.

 

زانیاریی زیاتر: داواکاری سێیەم بریتیە لە پابەندکردنی لایەنی پەیوەندیدار بە زیادکردنی زمانی کوردی بۆ پێگەی فەرمی یاسادانانی عێراق بەهەمان شێوەی زمانی عەرەبی، لە داواکاری چوارەمدا سکاڵاکار دەڵێت، لە بەرگی ڕۆژنامەکەدا بە پیتی کوردی نوسراوە ( ڕۆژنامەی وەقائعی عێراقی) بەبێ ئەوەی بەشێوەیەکی ڕاست وەرگێڕانی بۆ بکرێت.

 

باکگراوند: بەپێی دەستوری هەمیشەیی عێراق لە ماددەی چوارەم بڕگەی یەکەم ئاماژە بۆ ئەوەکراوە، زمانی عەرەبی و کوردی زمانی فەرمی وڵاتە، هەروەها لە ماددەی چوارەم و  دووەم ئاماژە بۆ ئەوە دەکات دەبێت هەردوو زمان لە ڕۆژنامەی فەرمی و نوسراوەکانی دەوڵەتدا بەکاربهێنرێت.