سەرۆکوەزیران بارزانی و سوودانی بەشداری لە کۆڕبەندی داڤۆس دەکەن

مەسرور بارزانی، سەرۆکی حکومەتی هەرێمی کوردستان بە یاوەری شاندێک بۆ بەشداریکردن لە کۆڕبەندی ئابووریی جیهان لە داڤۆس دەبێت و بڕیارە لەگەڵ 40 سەرکردە و کۆمپانیای جیهانی کۆبوونەوە ئەنجامبدات. لەسەر ئاستی عێراقیش محەممەد شیاع سوودانی، سەرۆکوەزیرانی عێراق بەشدار دەبێت. هەروەها بڕیارە 17ی مانگ مەسرور بارزانی بەشداری پانێڵێک بکات لە کۆڕبەندەکە لەسەر رۆژهەڵاتی ناوەڕاست و رۆژی 18ی مانگیش سوودانی پانێڵی دەبێت. 

 

بۆچی گرنگە: کۆڕبەندی ئابووریی جیهان لە داڤۆس ساڵانە بە بەشداری سەرکردەی وڵاتانی زلهێز و خاوەنی کۆمپانیا زەبەلاحەکان بەڕێوەدەچێت و گەورەترین ئەو کێشانەی رووبەڕووی مرۆڤایەتی دەبنەوە تاوتوێ دەکرێن. هەرێمی کوردستان چاوەڕوان دەکرێت لە کۆڕبەندەکە سەرۆکوەزیران بارزانی دیدار لەگەڵ چەندین سەرکردەی وڵاتاندا ئەنجامبدات و پەیوەندییە دیپلۆماسی و ئابوورییەکانی هەرێمی کوردستان بەهێزتر بکات. 

 

ئەوەی پێویستە بیزانیت: لە داڤۆس بۆ یەکەمجار ماڵی کوردستان دەکرێتەوە. لە ماڵەکە بە سەرۆکایەتی سەرۆکوەزیران بارزانی چەندین دیداری سیاسی، پانێڵ و کۆبوونەوە لەگەڵ کۆمپانیا گەورەکان ئەنجامدەدرێن کە دەبێتە هۆی پشتیوانیکردنی وەبەرهێنان لە هەرێمی کوردستان. هەروەها لەگەڵ سەرۆکوەزیران بارزانی شاندێکی باڵای وەبەرهێنانی کوردستان بەشدارن کە 11 وەبەرهێنەری گەورەی کوردستانن و لە ماڵی کوردستان کۆبوونەوە ئەنجام دەدەن.

 

چی پێشبینی دەکرێت: بۆ یەکەمجارە لە داڤۆس کوردستان ماڵی خۆی دەبێت لە پاڵ وڵاتانی وەکو (ئیمارات، سعوودیە، هیندستان، بەلجیکا، یۆنان و پۆڵەندا). ماڵی کوردستان دەبێتە مارکێتینگێکی باش و هێنانی سەرمایەی جیهانی بۆ هەرێمی کوردستان.

 

ژمارەکان وا دەڵێن: زیاتر لە 100 حکومەت و نزیکەی 1000 کۆمپانیا لە کۆڕبەندی ئابووری جیهان لە داڤۆس بەشدار دەبن.