ترەمپ دەیەوێت ئێران بهێنێتە خاڵی سفر

ئاڤا نیوز

 

ئەمریکا سزای نوێی بەسەر ئێراندا سەپاند، سزاکان زیاتر لە 30 کەس و کەشتیی پەیوەست بە ئێران دەگرنەوە، لە نێویاندا سەرۆکی کۆمپانیای نیشتمانی نەوتی ئێرانیش هەیە کە بەهۆی دەڵاڵی فرۆشتن و ناردنی نەوتەوە سزاکەی بەسەردا سەپێنراوە.

 

چیرۆکی سەرەکی: ئیدارەی دۆناڵد ترەمپ، دەیەوێت سەرجەم سەرچاوە داراییەکانی ئێران وشک بکات، تەنانەت هەناردەکردنەوەی نەوتی کوردستان و قەدەغەکردنی کڕینی غاز لەلایەن عێراقەوە لەو وڵاتە بەشێکن لە ڕێککارەکان، نایەوێت بەهیچ جۆرێک هاوشێوەی ساڵانی ڕابردوو ئێران لە عێراق سوودمەند بێت و لەم رێگەیەوە دۆلاری دەست بکەوێت، هەموو ئەمانەش لەپێناو یەک شتن، کەمکردنەوە و سنووردارکردنی چالاکییە سەربازییەکانی.

لێدوانی فەرمی: سکۆت بێسێنت، وەزیری گەنجینەی ئەمریکا دەڵێت: ئێران بۆ فرۆشتنی نەوت و دابینکردنی بودجەکەی پشت بە تۆڕێکی سێبەر دەبەستێت کە لە کۆمەڵێک کەشتی و دەڵاڵ پێکدێت، لەبەرامبەردا ئەمریکا سوود لە هەموو ئامرازە بەردەستەکانی وەردەگرێت بۆ سنووردارکردن و بەئامانجگرتنی هەموو ئەو لایەنانەی سوود بە ئێران دەگەیێنن بەتایبەت لەڕووی نەوتەوە، هەر کەسێک مامەڵە لەگەڵ نەوتی ئێران بکات، ڕووبەڕووی سزاکان دەبێتەوە.

 

-    ئێران تاوەکو ئێستا سیاسەتێکی جیاواز و سەرکەوتووانەی هەبووە و پشتی بە هاوکێشەی ئاڵۆز بەستووە.

-    ئێران تۆرێکی لە دەرەوەی وڵاتەکەی پێکهێناوە، لە کەشتییەکەوە بۆ کەشتییەکی تر نەوتی گواستووەتەوە.

 

لەلایەکی دیکەوە: دیپلۆماتکارێکی باڵای ئێران دەڵێت، ئێران مانگی یەکی ئەمساڵ لەگەڵ وڵاتانی زلهێزی ئەوروپی، لەوانە ئەڵمانیا، فەرەنسا و بەریتانیا، سەبارەت بە بەرنامە ئەتۆمییەکەی لە سویسرا کۆبوونەوەی کردووە و  گفتوگۆکانیش بونیاتنەر بوون، ئەمە لەکاتێکدایە زۆربەی سزاکانی ئەو وڵاتە بههۆی بەرنامە ئەتۆمییەکانی بەسەریدا سەپێنراون.