ڕووسیا لە دانوستانە ئەتۆمییەکانی ئێران هاوکاریی ئەمریکا دەکات

ئاڤا نیوز

 

بەگوێرەی زانیارییەکان، ڕووسیا ڕازی بووە بەوەی لە پرسی دانوستانە ئەتۆمییەکانی ئێران هاوکاریی ئەمریکا بکات.

زانیاریی بەدەستهاتوو: بەگوێرەی چەند سەرچاوەیەکی ڕووسی کە لێدوانیان بۆ ئاژانسی بلوومبێرگ داوە، ڤلادیمیر پووتین، سەرۆکی ڕووسیا، ڕازی بووە بەوەی لە بابەتەکانی وەک "بەرنامەی ئەتۆمی ئێران و پشتیوانیی ئێران لە هێزە میلیشیاییەکانی ناوچەکە کە لە دژی ئەمریکان" هاوکاریی ئەمریکا بکات.

زانیاریی زیاتر: بەگوێرەی سەرچاوەکان ترەمپ لە پەیوەندییە تەلەفۆنییەکەی مانگی شوباتی ڕابردوودا لەگەڵ پووتین ئەم بابەتەی باس کردووە و دوای کردووە ڕووسیا ڕۆڵێکی هاوکارانە بگێڕێت. ئەم بابەتە هەروەها لە کۆبوونەوەی نێوان بەرپرسانی ئەمریکا و ڕووسیا لە ڕیازی پایتەختی سعودیە دووبارە خراوەتەوە بەر باس و گفتوگۆ.

ئەوەی لەبارەیەوە دەگوترێت: دێمێتری پێسکۆڤ، گوتەبێژی کرێلمین لە وەڵامی پرسیارێکی بلوومبێرگدا گوتوویەتی "ڕووسیا لەو باوەڕەدایە ئەمریکا و ئێران دەبێت لە ڕێگەی گفتوگۆوە کێشەکانیان چارەسەر بکەن و مۆسکۆش ئامادەیە بۆ ئەنجامدانی هەر کارێک لەم پێناوەدا."

بۆچوونی لایەنی بەرامبەر: ئیسماعیل بەقایی، وتەبێژی وەزارەتی دەرەوەی ئێران ئەوەی بە ئاسایی ناوبردووە کە ڕووسیا ببێتە نێوەندگیری نێوان ئەمریکا و ئێران.