وۆڵ ستریت جۆرناڵ: ئیسرائیل دەیەوێت سووریای نوێ لەسەر بنەمای ناناوەندێتیی بەڕێوەبچێت

ئاڤا نیوز

 

بەگوێرەی ڕۆژنامەی وۆڵ ستریت جۆرناڵی ئەمریکی، ئیسرائیل دەستیکردووە بە لۆبیکردن لە ئەمریکا بۆ لاوازکردنی حکومەتی سووریا.

 
زانیاریی زیاتر: ئیسرائیل دەیەوێت حکومەتی سووریا پارچەپارچە و لاواز بێت و بۆ ئەمەش لای ئەمریکا پێشنیازی کردووە کە سووریای نوێ لەسەر بنەمای ناناوەندێتیی بەڕێوەبچێت. 

بابەتە ستراتیژییەکان: هاوکات ئیسرائیل داوایکردووە ئەمریکا ئاسانکاری بکات بۆ مانەوەی بنکە سەربازییەکانی ڕووسیا لە سووریا تا ببنە هۆی لاوازیی سووریا.

ئەو مانەیەی دەیگەێنێت: لە دوای ڕووخانی بەشار ئەسەد، ئیسرائیل نیگەرانیی ئەوەی لا درووست بووە کە سووریای نوێ ببێتە سووریایەکی یەکگرتوو و بەهێز، بە پێچەوانەی سووریای سەردەمی ئەسەد کە بە هۆی دیکتاتۆری و ناکۆکییە تائیفییەکان و شەڕی ناوخۆوە سووریایەکی لاواز بوو.

لەلایەکی دیکە: ئیسرائیل هەروەها لە دەستڕۆیشتووییەکانی تورکیا لە سووریا نیگەرانە، بە تایبەت کە بە هۆی شەڕی غەززەوە پەیوەندییەکانی نێوان ئەو دوو وڵاتە ئاڵۆزیی زۆریان تێکەوتووە. 

مەترسییە پێشبینیکراوەکان: ئیسرائیل، دەسەڵاتی ئیسلامییەکانی سووریا بە مەترسی بۆ سەر خۆی دەزانێت، هەر بۆیە دەیەوێت حکومەتی سووریا لاواز بکات و بۆ ئەمەش داوای کردووە باشووری سووریا لە چەک دابماڵرێت و هەروەها پشتیوانی خۆی بۆ درووزەکان ڕاگەیاندووە و یەک ملیار دۆلاری بۆ پشتیوانیکردن لە درووزەکان تەرخان کردووە تاوەکو درووزەکان ڕازی بکات بەوەی حکومەتی نوێی سووریا ڕەت بکەنەوە.