نەتەوە یەکگرتووەکان: ژیانی ئافرەتان بەهۆی ژینگەی ئینتەرنێتەوە لە مەترسیدایە

ئاڤا نیوز

بە پێی ڕاپۆرتی نەتەوە یەکگرتووەکان، مافەکانی ئافرەتان و کچان بەهۆی زیادبوونی توندوتیژییەکان لە ژینگەی ئینتەرنێتدا لە مەترسیدان.

چیرۆکی سەرەکی: بە بۆنەی 8ـی مارس ڕۆژی جیهانیی ئافرەتان، نەتەوە یەکگرتووەکان ئاماری مەترسیداری ئافرەتانی بەهۆی ژینگەی ئینتەرنێت و تۆڕە کۆمەڵایەتییەکان بڵاو کردەوە و بە توندوتیژی لە ژینگەی ئینتەرنێت ناوی دەبات.

ڕاگەیێنراوی فەرمی: ڕاپۆرتەکەی نەتەوە یەکگرتووەکان باس لە شێوازی نوێی توندوتیژی و سوکایەتی دەکات کە لە نێو دنیای دیجیتاڵیدا هەیە، داوای کاری بەپەلە دەکات بۆ ڕووبەڕووبوونەوەی، لە سەرانسەری 12 وڵاتدا لە ئەوروپا و ناوەڕاستی ئاسیادا، ڕاپۆرتەکە بۆی دەرکەوتووە کە لە 53%ـی ئافرەتانی پێگەیشتوو لە ئینتەرنێت ڕووبەڕووی شێوازێک لە توندوتیژی تەکنەلۆجیا بوونەتەوە.

ئەماژە بەوەش دەکات، توندوتیژی و سوکایەتیکردن لە ڕێی ئینتەرنێتەوە شێوازی زۆری هەیە و دیارترینییان هەراسانکردن و سوکایەتیکردن و شوێنکەوتنی ئافرەتانە، هەروەها بڵاوکردنەوەی ڕق و کینەی ڕەگەزی و بڵاوکردنەوەی وێنە بەبێ مۆڵەت.

زانیاری زیاتر: ڕاپۆرتەکە ئاماژە بە زیادبوونی گوتارەکان دەکات دژی مافەکانی ئافرەتان، تیشک دەخاتە سەر کاریگەرییەکانی جەنگەکان، هەژاری، سەرهەڵدانی خێرای ژیری دەستکرد و گۆڕانکارییە سیاسییەکان کە بووەتە هۆی دروستبوونی گۆڕانکاری.

باکگراوند: لە مانگی سێی ساڵی رابردوودا، پەرلەمانی یەکێتیی ئەوروپا یەکەم یاسای بۆ بەرەنگاربوونەوەی توندوتیژی ئەلیکترۆنی دژی ئافرەتان پەسەند کرد و داوای یاسا و هەنگاوی بەهێزتری کرد.