ئەڵمانیا لەماوەی دوو مانگدا 94 پەنابەری عێراق دیپۆرت دەكاتەوە

 

ئاڤا نیوز

فیدراسیۆنی سەرانسەری پەنابەرانی عێراقی دیپۆرتكردنەوەی پەنابەران بەزۆرەملێ، بە تاوان وەسف دەكات و بەپێویستی دەزانێت، ئەو هەڵمەتە ڕابگیرێت.

وێنە گەورەكە: لەچوارچێوەی جێبەجێ كردنی ڕێككەوتنی نهێنی نێوان هەردوو حكومەتی ئەڵمانیا و عێراق بۆ ڕەوانەكردنەوەی پەنابەرانی عێراقی، ئەڵمانیا سیاسەتی توندكردنی ڕێكارەكان بەرامبەر پەنابەرانی گرتووەتە بەر، بۆ ئەم مەبەستەش هەڵمەتێكی فراوانی دەستگیركردن و دیپۆرتكردنەوەی پەنابەرانی عێراقی دەستپێكردووە.

چی ڕوویدا: فیدراسیۆنی سەرانسەری پەنابەرانی عێراق ئاشكرای دەكات، لە مانگەكانی شوبات و ئازار، دوو پرۆسەی ناردنەوەی زۆرەملێی پەنابەرانی عێراق لە ئەڵمانیاوە جێبەجێ كراوە و 94 پەنابەر دیپۆرتكراونەتەوە.

ڕاگەیێنراوی فەرمی: فیدراسیۆنی سەرانسەری پەنابەرانی عێراق دەڵێت، بەشی زۆری ئەو پەنابەرانەی دیپۆرت كراونەتەوە، هیچ كێشەیەكی یاسایی و تاوانكارییان نەبووە، بەڵكو تەنها لەچوارچێوەی جێبەجێكردنی ئەجێندایەكی هاوبەش و نهێنی نێوان عێراق و ئەڵمانیا، ئەو كارە كراوە.

خاڵە نەرێنییەكان: لە نێو ئەو پەنابەرانە چەندین خێزان و کەسی تێدابووە کە خەریکی کارکردن و خوێندن و بەدەستهێنانی بروانامەی پیشەیی بوون.